(عابد چودھری) سی ٹی او لاہور لیاقت علی ملک نے ٹرانسپوٹررز، ہاکروں اور ٹرکوں سے منتھلی لینے پر 8 ٹریفک وارڈنز اور ایک ڈرائیور کانسٹیبل کو نوکری سے برخاست کر دیا۔

تفصیلات کے مطابق ڈی ایس پی ٹریفک سٹی سرکل محمد نوید نے دوران انکوائری انسپکٹر سمیت تمام ٹریفک وارڈنز اور کانسٹیبل کو قصوروار ٹھہرایا۔ ملزمان کیخلاف الزامات درست ثابت ہونے پر چیف ٹریفک آفیسر لاہور کیپٹن(ر) لیاقت علی ملک نے 8 ٹریفک وارڈنز اور ایک ڈرائیور کانسٹیبل کو نوکری سے برخاست کر دیا۔ دوران انکوائری ریٹائرڈ ہونے والے انسپکٹر سلطان ظفر کیخلاف سخت قانونی کارروائی اور مقدمہ درج کرنے کے احکامات بھی جاری کردئیے۔

سی ٹی او لاہور کا کہنا ہے کہ کرپشن، اختیارات سے تجاوز اور شہریوں سے ناروا سلوک کرنے والوں کی محکمہ میں کوئی گنجائش نہیں۔ کرپشن کرنے والے اہلکاروں کو نشان عبرت بنایا جا رہا ہے۔