ویب ڈیسک: ملک میں سردی کی انٹری ہوچکی ہے، مسلسل اسموگ اور دھند کے چھٹ جانے کے بعد سردی کی لہر میں اضافہ ہوچکا ہے جس کے پیش نظر تعلیمی اداروں کو کھول دیا گیا ہے، وفاق میں تعلیمی اداروں کے اوقات کار تبدیل کردیے گئے ہیں۔
تفصیلات کےمطابق فیڈرل ڈائریکٹوریٹ آف ایجوکیشن نے وفاق کے تعلیمی اداروں کے اوقات کار میں تبدیلی کا نوٹی فکیشن جاری کر دیا،مارننگ شفٹ میں تمام اسکولز صبح ساڑھے 8 سے 2 بجے تک کھلے رہیں گے۔
نوٹی فکیشن کے مطابق جمعہ کو اسکولز ساڑھے 8 بجے سے دوپہر ساڑھے 12 بجے تک کھلے رہیں گے۔ مارننگ شفٹ والے ادارے صبح ساڑھے 8 سے ڈیڑھ بجے تک کھلیں گے۔ ایوننگ شفٹ والے ادارے دوپہر ڈیڑھ بجے سے شام 6 بجے تک کُھلے رہیں گے۔
واضح رہے کہ گزشتہ روز محکمہ ماحولیات نےلاہور سمیت پنجاب بھر میں اسموگ کی شدت میں کمی کے بعد تعلیمی ادارے کھولنے کا فیصلہ کرتےنوٹیفکیشن جاری کیا، جس کے مطابق تمام تعلیمی ادارے 20 نومبر 2024 سے کھلیں گے، فزیکل کلاسز کے ساتھ تدریسی عمل بحال ہوگا ،اسکول کھلنے کا وقت صبح 8:45 بجے سے پہلے نہیں ہوگا، اس حوالے محکمہ ماحولیات کی جانب سے نوٹی فکیشن کردیا گیا ہے۔
جاری نوٹی فکیشن کے مطابق طلبہ اور اساتذہ کے لیے ماسک پہننا لازمی قرار دیا گیا، اسکولوں میں بیرونی کھیلوں اور ہم نصابی سرگرمیوں پر مکمل پابندی عائد کر دی گئی،ٹریفک کے دباؤ سے بچنے کے لیے کلاس وائز اسکول کی چھٹی کا وقت متعین کرنے کی ہدایت کی گئی۔
