وقاص احمد : سبزہ زار کے علاقے میں سٹیج اور فلم کی اداکارہ فیروزہ علی کی گاڑی پر فائرنگ کا معاملہ ،پولیس نے زخمی کوریوگرافر توصیف شاہ کے بھائی توفیق کی مدعیت میں 5 افراد کے خلاف مقدمہ درج کر لیا ۔
تھانہ سبزہ زار میں درج ہونیوالی ایف آئی آر کےمطابق توصیف شاہ گزشتہ رات گاڑی پر ہونیوالی فائرنگ سے زخمی ہوا تھا۔ مقدمے میں رانا سجاول، عادل اور فہیم کو نامزد جبکہ دو ملزمان نامعلوم ہیں۔ ایف آئی آر کے مطابق ملزمان نے توصیف شاہ اور فیروزہ علی کو جان سے مارنے کیلئے فائرنگ کی۔ ایف آئی آر کے مطابق ملزمان توصیف شاہ اور اداکارہ فیروزہ علی کو مارنے کی دھمکیاں دے چکے ہیں۔
ملزمان اداکارہ کو بلیک میل کرکے بھاری رقم وصول کر چکے ہیں۔ زخمی توصیف شاہ کو گنگا رام ہسپتال میں طبی امداد فراہم کی گئی جہاں اسکی حالت خطرے سے باہر ہے۔پولیس کا کہنا ہے واقعہ کے بارے میں شواہد جمع کر رہے ہیں۔