اویس نقوی: پاکستان اور نیدرلینڈز نے انسانی سمگلنگ روکنے کیلئے باہمی تعاون بہتر بنانے کی ضرورت پر زور دیا ہے۔
نیدرلینڈز کی سفیر ہینی ڈی وریس نے وزارت داخلہ کا دورہ کیا جہاں وزیر داخلہ محسن نقوی نے ان کا کا خیر مقدم کیا، ملاقات میں دوطرفہ تعاون سمیت باہمی دلچسپی کے امور پر تبادلہ خیال ہوا، مختلف شعبوں میں اشتراک کار بڑھانے پر بھی گفتگو ہوئی۔ وزیر داخلہ نے نیدرلینڈز کی نئی حکومت اور اپنی ہم منصب کو مبارکباد پیش کی، ملاقات کے دوران انسانی سمگلنگ کو روکنے کیلئے باہمی تعاون بہتر بنانے کی ضرورت پر زور دیا گیا۔
وفاقی وزیر داخلہ محسن نقوی نے کہا کہ پاکستان نیدرلینڈز کے ساتھ تعلقات کو انتہائی اہمیت دیتا ہے، نیدرلینڈز کے ساتھ مختلف شعبوں میں تعلقات کو بڑھانے کے خواہاں ہیں، انسانی سمگلنگ روکنے کیلئے دو طرفہ اشتراک کار بڑھانے کی ضرورت ہے، انسانی سمگلرز بہت بڑا مافیا ہے، کوئی ملک تنہا نہیں نمٹ سکتا۔
ان کا کہنا تھا کہ مشترکہ اقدامات ہی انسانی سمگلنگ کے خلاف کارگر ہو سکتے ہیں، اس ضمن میں اطالوی ٹیم جلد پاکستان کا دورہ کرے گی۔ ملاقات کے دوران افغان مہاجرین کی دیکھ بھال کیلئے تعاون بڑھانے پر بھی اتفاق کیا گیا۔
اس موقع پر پاکستان اور نیدرلینڈز کے مابین کرکٹ روابط بڑھانے پر بھی اتفاق ہوا، محسن نقوی کا کہنا تھا کہ نیدرلینڈز کے ساتھ کرکٹ کے فروغ کا پلان تیار کر رہے ہیں۔ نیدرلینڈز کی سفیر کی جانب سے محسن نقوی کو صدر ایشین کرکٹ کونسل کے منصب پر نامزدگی پر مبارکباد پیش کی گئی۔
سفیر نیدرلینڈز کا کہنا تھا کہ کھیل سمیت مختلف شعبوں میں تعاون کا فروغ انتہائی اہمیت کا حامل ہے، کرکٹ میں تعاون کے فروغ سے نیدرلینڈز کی ٹیم کو پاکستان کے تجربے سے سیکھنے کاُ موقع ملے گا۔
وفاقی سیکرٹری داخلہ خرم علی آغا، ایڈیشنل سیکرٹری داخلہ رفعت مختار راجہ بھی اس موقع پر موجود تھے۔