دلشاد راؤ:وزیراعلیٰ پنجاب مریم نواز شریف نے فلمی صنعت کی بحالی کے لیے تاریخی قدم اٹھالیا۔
پنجاب کابینہ کی منظوری کے بعد8 رکنی "پنجاب فلم فنڈ ڈسبرسمنٹ کمیٹی"بھی تشکیل دے دی گئی ہے،پنجاب کی سینئر وزیر مریم اورنگزیب اس 8 رکنی کمیٹی کی کنوینر ہوں گی، نوٹیفیکیشن جاری کردیاگیاہے۔
وزیراعلیٰ مریم نواز نے پنجاب کے پہلے فلم سٹی، فلم سٹوڈیو، پوسٹ پروڈکشن لیب اور پاکستان کے پہلے فلم سکول کے قیام کی منظوری بھی دے دی ہے۔نوازشریف آئی ٹی سٹی میں فلم سٹی، فلم سٹوڈیو، پوسٹ پروڈکشن لیب کے لیے جگہ مختص کر دی گئی،ڈیزائن سمیت دیگر اقدامات پر پیش رفت کا پہلا جائزہ بھی مکمل کرلیاگیاہے۔
"پنجاب فلم فنڈ ڈسبرسمنٹ کمیٹی" رواں مالی سال میں پنجاب کی فلم انڈسٹری کے فروغ کے لیے فلم سازوں کو گرانٹ جاری کرے گی،وزیر اطلاعات عظمیٰ بخاری، وزیر خزانہ مجتبیٰ شجاع الرحمن، وزیر انسانی حقوق و اقلیتی امور سردار رمیش سنگھ اروڑا بھی اس کمیٹی کے رکن ہیں،صوبائی سیکرٹری اطلاعات طاہر رضا ہمدانی، سیکرٹری منصوبہ بندی آصف طفیل، سیکرٹری خزانہ مجاہد شیر دل اور سیکرٹری سیاحت فرید احمد تارڑ بھی کمیٹی میں شامل ہیں۔
نوٹیفیکیشن کے مطابق کمیٹی فلم سازوں اور فلم ساز کمپنیوں کی درخواستوں کا جائزہ لے گی،اس کے ساتھ ساتھ کمیٹی نئی فلموں کی تیاری اور نامکمل فلموں کے اسکرپٹس کابھی جائزہ لے گی، کمیٹی فنڈ کے انتظام،اہلیت کے معیار اور باکس آفس مراعات سے متعلق امور پر بھی فیصلہ کرے گی۔
نوٹیفیکیشن میں یہ بھی کہاگیاہے کہ کمیٹی کو کسی معاملے پر ذیلی کمیٹیاں تشکیل دینے کا اختیار بھی حاصل ہوگا، مریم اورنگزیب کی زیرصدارت ہونےوالے کمیٹی کے پہلے اجلاس میں وزیراعلیٰ کے وژن پر عملدرآمد کے لئے اہم فیصلے کئے گئے ہیں۔