صاف ستھرا پنجاب مشن جاری،ڈی سی لاہور کا مختلف علاقوں  کادورہ

 بسام سلطان:  وزیر اعلیٰ پنجاب مریم نواز شریف کا صاف ستھرا لاہور مشن جاری ہے، ڈی سی لاہور کا رنگ روڈ سروس لین محمود بوٹی تا بیدیاں روڈ کا دورہ کیا۔
تفصیلات کے مطابق   چیف آفیسر میٹروپولیٹن کارپوریشن شاہد عباس کاٹھیا، اسسٹنٹ کمشنر واہگہ محمد عامر بٹ ہمراہ تھے،اسسٹنٹ کمشنر صدر عبد الباسط صدیقی، ایل ڈبلیو ایم سی اور رنگ روڈ حکام ہمراہ تھے، ڈی سی لاہور نے بھینی، چہار باغ، مناواں اور اڈا چھبیل سمیت مختلف مقامات کا دورہ کیا، صفائی ستھرائی و دیگر اقدامات کا جائزہ لیا،ایل ڈبلیو ایم سی حکام صفائی میکانزم کو بہتر بنانے کیلئے ضروری اقدامات اٹھائیں ،اسسٹنٹ کمشنرز اور ایل ڈبلیو ایم سی حکام کو بطور ٹیم ورک کام جاری رکھنے کی ہدایت جاری کردی گئی۔
    ڈی سی لاہور نے کہا کہ شہر کی خوبصورتی کو برقرار رکھنے کے لئے کوڑا کرکٹ ٹھکانے لگایا جائے،شہر بھر کے خالی پلاٹوں میں گندگی کے لگے ہوئے ڈھیر فی الفور کلئیر کروائے جائیں،شہر کی خوبصورتی میں اضافہ کے لئے شہری بھی ضلعی انتظامیہ لاہور کا ساتھ دیں،شہری کوڑا مختص جگہوں پر پھینکیں۔