جہانگیر عالم،فاران یامین :  گھوٹکی میں اوباڑو کے قریب بس اور ٹریلر کے درمیان خوفناک تصادم کے نتیجے میں 8 مسافر جاں بحق جبکہ 7 زخمی ہوگئے۔

موٹر وے پولیس کے مطابق حادثے کا شکار مسافر بس پنجاب سے کراچی جا رہی تھی کہ گھوٹکی میں اوباڑو کے قریب موٹر وے ایم فائیو پر حادثہ پیش آیا، جاں بحق افراد میں 2 خواتین اور دو بچے بھی شامل ہیں۔

حکام کا کہنا ہے کہ حادثے میں تمام زخمیوں کی حالت تشویشناک ہے، پولیس اور ریسکیو ٹیموں نے نعشوں اور زخمیوں کو ہسپتال منتقل کر دیا ہے۔موٹروے پولیس کے مطابق بارش کے باعث ریسکیو میں مشکلات کا سامنا کرنا پڑا۔

صوبائی دارالحکومت لاہور میں امامیہ کالونی،برکت پلی کے قریب لوڈر ٹرک آبادی میں گرگیا جس کے نتیجے میں ایک خاتون جاں بحق جبکہ ایک شخص زخمی ہوگیا جیسے ہسپتال منتقل کردیا گیا ہے۔
راوی پل جانب شاہدرہ پر ایک مزدا کا حصہ ٹوٹ گیا۔ سی ٹی او کے مطابق  مزدا خراب ہونے سے ٹریفک کو ایک لائن میں چلایا جارہاہے، کالاشاہ کاکو سے شاہدرہ،راوی پل جانیوالی ٹریفک کیلئے ڈائیورشن لگادی گئی ہے۔اُن کا مزید کہنا ہے کہ  ٹریفک کی روانی بحال کرنے کیلئے عملی اقدامات کئے جارہے ہیں۔

دوسری جانب  لاہور کے علاقے علامہ شبیر عثمانی روڈ پر تیز رفتار کار کی ٹکر سے 3 موٹر سائیکل سوار زخمی ہوگئے، حادثے کے بعد کار سوار خاتون موقع سے فرار ہوگئی۔