اسلام آباد ہائی کورٹ اور چاروں ہائیکورٹس میں مستقل چیف جسٹس مقرر کرنے کا فیصلہ کر لیا گیا۔
معلوم ہوا ہے کہ چار مئی تک چاروں صوبائی ہائی کورٹس کے لیے نامزدگیاں طلب کرلی گئی ہیں، ہائی کورٹس میں مستقل چیف جسٹس مقرر کرنے کے لیے 3 ہر ہائی کورٹ سے سینئر ججز کے ناموں پر غور ہوگا۔
جوڈیشل کمیشن کا 2 مئی کو ہونے والا اجلاس ری شیڈول کر دیا گیا ہے۔
یہ اہم اجلاس اب 19 مئی کو ہوگا جس میں بلوچستان اور سندھ ہائی کورٹس کے چیف جسٹسز کی تعیناتی پر غور کیا جائے گا۔
جوڈیشل کمیشن پشاور اور اسلام آباد ہائی کورٹس میں مستقل چیف جسٹسز کی تعیناتی پر بھی غور کرے گا۔
اسلام آباد ہائی کورٹ میں ججز کی سینارٹی کا ایک مقدمہ آئینی بینچ میں زیر سماعت ہے، جسٹس محمد علی مظہر کی سربراہی میں آئینی بینچ 22 اپریل کو اس کیس کی سماعت کرے گا۔ یہ کیس اسلام آباد ہائی کورٹ کے بعض ججوں کی درخواست پر بنا ہے جن کا مؤقف ہے کہ کسی دوسری ہائی کورٹ سے ٹرانسفر ہو کر اسلام آباد ہائی کورٹ آنے والے ججوں کی سنیارٹی پہلے سے موجود ججوں کی سنیارٹی کو متاثر کرنے کا سبب بنی ہے۔ ان ججوں کے نزدیک ایسے ٹرانسفر ہونا ہی نہیں چاہئیں۔