(مانیٹرنگ ڈیسک) بچوں کے استحصال سے بچاؤ اور حقوق کے تحفظ پر خدمات کیلئے پاکستان کی چائلڈ پروٹیکشن اینڈویلفیئربیوروکی چئیرپرسن سارہ احمد کو گلوبل کولیبو ریٹو ایوارڈ سے نواز دیا گیا۔
ذرائع کے مطابق چائلڈ پروٹیکشن اینڈویلفیئربیوروکی چئیرپرسن سارہ احمد کو بچوں کے استحصال سے بچاؤ اور ان کےحقوق کے تحفظ پر خدمات کے اعتراف میں گلوبل کولیبو ریٹو ایوارڈ دیا گیا، گلوبل کولیبو ریٹو 50 سے زیادہ بین الاقوامی چائلڈ ویلفیئر اور ایڈووکیسی کی تنظیموں،عقیدے پر مبنی اداروں، سروائیور نیٹ ورکس اور حکومتوں پر مشتمل تنظیم ہے جو بچوں کے تحفظ اور استحصال کا شکار بچوں کی فلاح وبہبود کے لیے مل کر کام کرتے ہیں۔
کولیبو ریٹو کی جانب سے دنیا بھر سے بچوں کےاستحصال کی روک تھام کیلئے فعال کردار ادا کرنے والے 10 افراد کو اس ایوارڈ کے لیے منتخب کیا گیا تھا۔ گلوبل کولیبو ریٹو ایوارڈ حاصل کرنے والوں میں یونیسف کی ڈائریکٹر، چائلڈ یو ایس اے کے سی ای او، سیرالیون کی خاتون اول، ہارورڈ یونیورسٹی کے پروفیسر، ہالی وڈ کے اداکار ٹیلر پیری اور دیگر شامل ہیں۔
ایوارڈ کی تقریب گزشتہ روز اٹلی کے شہر روم میں منعقدہوئی جس میں سیاستدان، بین الاقوامی این جی اوز نمائندوں، انٹر فیتھ لیڈرز، مخیر حضرات، استحصال کا شکار بچ جانے والے بچے، صحافیوں اور دیگر افراد شریک ہوئے۔
اس حوالے سے چیئرپرسن چائلڈ پروٹیکشن بیورو سارہ احمد نے ایکسپریس سے بات کرتے ہوئے کہا اتنے بڑے ایوارڈ کاملنا ان کے اور پاکستان کے لیے اعزاز کی بات ہے اور گلوبل کولیبو ریٹو ایوارڈ کو پاکستان کے تمام بچوں کے نام کرتی ہوں۔
انھوں نے کہا کہ ایوارڈ حاصل کرنے کے بعد بچوں کے استحصال کی روک تھام اور ان کے حقوق کے تحفظ کے لئے پہلے سے زیادہ ذمہ داری عائد ہوتی ہے اور اس ذمہ داری کو مزید احسن طریقے سے سرانجام دوں گی،ایوارڈ حاصل کرنے پر چئیرمین عمران خان اور حکومت پنجاب کی جانب سے سپورٹ کرنے پر شکر گزار ہوں۔
اس کے علاوہ چائلڈ پروٹیکشن بیورو کی ٹیم کا شکریہ ادا کرتی ہوں جن کے کام کی بدولت مجھے یہ ایوارڈ ملا۔انہوں نے کہا کہ ان کا مقصد تمام بے سہارا اور عدم توجہی کا شکار بچوں کو تحفظ فراہم کرنا اور بچوں کے استحصال کی روک تھام کو ممکن بنانا ہے۔