روزینہ علی : سی ای او لاہور قلندرز عاطف رانا کا کہنا ہے کہ پی سی بی سمیت ہم  سب کا ایک ہی  مقصد پی ایس ایل کو دنیا کی نمبر ون لیگ بنانا ہے۔ 

سی ای او لاہور قلندرز عاطف رانا نے لاہور اور اسلام آباد  اسپورٹس جرنلسٹس کے درمیان میچ کے موقع پر گفتگو  کرتے ہوئے کہا کہ پی سی بی ، فینز اور ہماری خواہش ہے کہ پی ایس ایل  ایک کامیاب لیگ بنے ، پی سی بی سمیت ہم  سب کا ایک ہی  مقصد پی ایس ایل کو دنیا کی نمبر ون لیگ بنانا ہے۔ آئی پی ایل کے دوران پی ایس ایل کروا کر اگر اچھے کھلاڑیوں کو زیادہ معاوضہ دے کر لایا جائے تو یہ  پی ایس ایل کے لیے بہترین ہو گا، امید ہے کہ  پی سی بی کمرشلی طور پر پی ایس ایل کے ونڈو کے حوالے سے اچھا فیصلہ کرے گا۔ اگر پی ایس ایل کے لیے حوالے سے اچھے فیصلے ہوں گے تو انہیں ہم سراہیں گے، آئی پی ایل کے ساتھ اور پلے آف بیرون ملک کرانے سے اگر پی سی بی کو لگتا ہے کہ پی ایس ایل اس طرح کامیاب ہوگا تو ہم سپورٹ کریں گے، ان فیصلوں کے ساتھ ساتھ کمرشل مواقع بھی دیکھنے چاہئیں۔ 

انہوں نے کہا کہ پلئیر ڈویلپمنٹ پروگرام کے حارث رؤف کے لیے بڑے فخر کی بات ہے کہ وہ پاکستان کی نمائندگی کر رہا ہے، پورے 25 کروڑ عوام کی امیدیں اور دعائیں حارث رؤف سے وابستہ ہوتی ہیں، انسان ہے کبھی اچھا پرفارم کرتا ہے اور کبھی نہیں کر سکتا۔ حارث رؤف اپنا سو فیصد دیتا ہے اور بڑی خوش آئند بات ہے کہ لوگ ان کے بارے میں بات کرتے ہیں۔ لاہور قلندرز نے 6 لاکھ سے زائد بچوں کے ٹرائلز کیے، حارث کے علاوہ شاہین، زمان سمیت بھی کھلاڑی بنے۔ حارث ، شاہین اور فخر کی اپنی محنت ہے ، لاہور قلندرز نے صرف انہیں پلیٹ فارم دیا۔ 

عاطف رانا کا کہنا تھا کہ اسپورٹس جرنلسٹس پاکستان کرکٹ کے اسٹیک ہولڈرز ہیں، انہیں ہمیشہ نظر انداز کیا گیا، ہماری کوشش ہو گی کہ اگلی بار کراچی کے صحافیوں کو بھی مدعو کریں، ہم نے گزشتہ پی ایس ایل میں ایک میچ اسپورٹس صحافیوں کے نام کیا تھا ۔