سٹی42: پاکستانیوں کے لئے اچھی خبر یہ ہے کہ سعودی عرب نے پاکستان کو مؤخر ادائیگی پر10 کروڑ ڈالرکی ماہانہ پیٹرولیم مصنوعات فراہمی جاری رکھنے کا فیصلہ کرلیا۔
یہ خوشخبری پاکستان کی وفاقی کابینہ کے اجلاس میں وزیراعظم شہباز شریف نے خود سنائی، کابینہ کا یہ اجلاس آج منگل کے روز اسلام آباد میں پرائم منسٹر ہاؤس میں ہوا۔
وزیراعظم نے کابینہ کو سعودی عرب کے کراؤن پرنس محمد بن سلمان کے خط سے آگاہ کیا اور بتایاکہ سعودی عرب نے مؤخر ادائیگی پر10 کروڑ ڈالرکی ماہانہ پیٹرولیم مصنوعات فراہمی جاری رکھنے کا فیصلہ کیا ہے۔
وزیراعظم نے سعودی عرب کے کراؤن پرنس محمد بن سلمان کی جانب سے پاکستان کی مسلسل سپورٹ اور حمایت کرنے پر اظہار تشکر کیا اور اعتراف کیا کہ سعودی عرب ہرمشکل وقت میں پاکستان کے ساتھ کھڑا رہا ہے۔
وزیراعظم کی زیرصدارت وفاقی کابینہ کے میں وفاقی کابینہ کو وزارتوں میں' ای آفس' پالیسی کے نفاذ پر بریفنگ دی گئی اور بتایا گیا کہ وفاقی حکومت کے 39 ڈویژنز میں ای آفس کا نفاذ 100 فیصد مکمل ہوچکا ہے۔
وزیراعظم نے سرکاری اداروں میں ڈیجیٹائزیشن مکمل کرنے کی ہدایت کی۔ وفاقی کابینہ نے اقوام متحدہ کے سمندری وسائل کے معاہدے پردستخط کی بھی منظوری دی۔
کابینہ نے کامران جہانگیر کی بطور ایم ڈی نیشنل بک فاؤنڈیشن تعیناتی، نیشنل کمیشن برائے انسانی حقوق میں ممبر تعیناتی کیلئے 6 ناموں اور صومالیہ کے نیشنل آئیڈینٹٹی سسٹم کے معاہدے میں توسیع کی منظوری دی۔
کابینہ نے ڈاکٹرشاہد اسلم مرزا کو ایم ڈی کورنگی فشریزہاربراتھارٹی تعینات کرنے کی بھی منطوری دی۔
کابینہ نے پاکستان انجینیئرنگ کونسل کے انتخابات میں بے ضابطگیوں کی تحقیقات کیلئے کمیشن بنانے کی منظوری بھی دے دی۔