سٹی42: پاکستان تحریک انصاف (پی ٹی آئی) کے رہنما اسد قیصر پر اسلام آباد کی حدود میں درج مقدمات کی تعداد 17 ہوگئی۔
عدالتی حکم پر ڈی ایس پی لیگل ساجد چیمہ نے اسد قیصر پر درج مقدمات کی تفصیلات عدالت میں جمع کروائیں۔
پولیس رپورٹ کے مطابق پی ٹی آئی فائنل کال سے پہلے رکن قومی اسمبلی اسد قیصر پر اسلام آباد کی حدود میں کل 9 مقدمات درج تھے، 24 نومبر کے احتجاج پر اسد قیصر کے خلاف مزید 8 مقدمات درج کیے گئے۔
اسد قیصر نے وکیل عائشہ خالد کے ذریعے اپنے خلاف درج مقدمات کی تفصیلات فراہمی کی درخواست دائر کر رکھی ہے۔
دریں اثنا سابق سپیکر اسد قیصر کے خلاف درج مقدمات کی تفصیلات فراہمی کی درخواست پر سماعت نہ ہو سکی، جسٹس ثمن رفعت امتیاز نے اسد قیصرکی درخواست پر سماعت کرنا تھی۔
عدالت نے وقت کی کمی کے باعث کیس لفٹ اوور کر دیا، عدالتی حکم پر پولیس نے اسد قیصر کے خلاف درج 17 مقدمات کی تفصیلات جمع کروادیں۔