ویب ڈیسک :  بھارتی کے شہر وشاکاپٹنم میں ایک شخص نے اپنی 9 ماہ کی حاملہ بیوی کو قتل کر دیا۔

مقتول خاتون 9 ماہ کی حاملہ تھی، اسے ایک ہی دن بعد ڈیلیوری کے لیے اسپتال میں داخل ہونا تھا۔بھارتی میڈیا کی رپورٹس کے مطابق 27 سالہ انوشا کی 28 سالہ جنانشور سے 2 سال قبل شادی ہوئی تھی۔

 جنانشور نے بیوی سے جھگڑے کے بعد اس کا گلا گھونٹ کر قتل کر دیا، بعد ازاں اس نے دوستوں اور اہلِ خانہ کو کال کر کے بتایا کہ انوشا چکرا کر گر گئی تھی اور اسے اسپتال لے جانے پر اس کی موت واقع ہو گئی ہے۔

جنانشور کے بیان پر انوشا کے اہلِ خانہ کو شک گزرا اور انہوں نے پولیس میں شکایت درج کروا دی۔پوچھ گچھ کے دوران جنانشور نے  اپنی بیوی کا گلا گھونٹ کر قتل کرنے کا اعتراف کر لیا۔اس نے دعویٰ کیا کہ انوشا اسے ہراساں کر رہی تھی اور اسے شک تھا کہ جنانشور کے غیر ازدواجی تعلقات ہیں۔پولیس کے مطابق جنانشور کو پی ایم پالم پولیس نے اپنی تحویل میں لے لیا ہے۔

پولیس نے بتایا ہے کہ متاثرہ انوشا 9 ماہ کی حاملہ تھی اور پیر کو اس کی ڈیلیوری ہونے والی تھی، اس دن کے اوائل میں اس جوڑے نے قبل از پیدائش کے چیک اپ کے لیے اسپتال کا دورہ بھی کیا تھا جہاں ڈاکٹروں نے انوشا کو ڈیلیوری کے لیے فوری داخلے کا مشورہ دیا تھا۔