ویب ڈیسک : کرکٹ کو فروغ دینے کے لیے پاکستان اور نیدرلینڈز کے درمیان اگلے برس کرکٹ سیریز کروانے پر اتفاق کیا گیا ہے ۔
وفاقی وزیرِ داخلہ محسن نقوی سے نیدرلینڈز کی سفیر ہینی ڈی وریس نے ملاقات کی، جس میں دونوں فریقین کے مابین باہمی دلچسپی کے امور، دوطرفہ تعلقات اور مختلف شعبوں میں تعاون بڑھانے پر تبادلۂ خیال کیا گیا۔
ملاقات میں پاکستان اور نیدرلینڈز کے درمیان کرکٹ کو فروغ دینے پر بھی بات چیت کی گئی اور اگلے برس دونوں ممالک کے درمیان کرکٹ سیریز کروانے پر اتفاق کیا گیا۔نیدرلینڈز نے کرکٹ کے فروغ کے لیے پی سی بی سے مفاہمت کی یادداشت پر دستخط کرنے پر بھی اتفاق کیا۔ نیدرلینڈز کی سفیر ہینی ڈی وریس نے کہا کہ نیدرلینڈ کی کرکٹ ٹیم اگلے برس پاکستان کا دورہ کرے گی اور اے ٹیم کے ساتھ میچ کھیلے گی۔
محسن نقوی نے اس موقع پر کہا کہ دو طرفہ تعلقات کے فروغ کے لیے پائیدار بنیادوں پر اقدامات کرنے کی ضرورت ہے۔ نیدرلینڈز میں کرکٹ کے فروغ کے لیے پوری سپورٹ کریں گے۔
انہوں نے مزید کہا کہ پاکستان نے کئی دہائیوں تک افغان مہاجرین کو اپنے پاس ٹھہرایا ہے، غیر قانونی طور پر پاکستان میں مقیم افغان مہاجرین کی واپسی کے لیے جامع پالیسی پر عمل کیا جا رہا ہے۔