(عابد چودھری) غالب مارکیٹ میں دوران ڈکیتی پولیس مقابلہ کی سی سی ٹی وی منظرعام پر آگئی، فوٹیج میں چہرہ چھپائے 2 ڈاکوؤں کو واردات کیلئے ریسٹورنٹ میں گھستے دیکھا جا سکتا ہے، اطلاع ملنے پر پولیس موقع پر پہنچی تو ڈاکووں نے فائرنگ کر دی۔
تفصیلات کے مطابق تھانہ غالب مارکیٹ کی حدود شیرپائو پل کے قریب ریسٹورنٹ میں واردات کی کوشش کی گئی،پولیس اور ڈولفن فورس نے ڈکیتی کی واردات ناکام بنا دی۔پولیس کے مطابق دو ڈکیت شیر پاؤ پل کے قریب واردات کررہے تھے،ون فائیو کال پر ایس ایچ او غالب مارکیٹ آصف عطاء اور ڈولفن ٹیم فوری موقع پر پہنچ گئی۔ ریسٹورنٹ میں چھپےڈاکوؤں نےسیدھی گولیاں ایس ایچ او پر برسائیں جس سےایس ایچ او آصف عطا اور ساتھی اہلکار محفوظ رہے۔
پولیس بہادری کا مظاہرہ کرتے ہوئے ایک ڈاکو زخمی حالت میں گرفتار کر لیا گیا جبکہ دوسرا موٹرسائیکل چھوڑ کر فرار ہونے میں کامیاب ہو گیا۔پولیس نے زخمی ڈاکو کو ہسپتال منتقل کردیا،پولیس کے مطابق زخمی ڈاکو شاہد کو طبی امداد کے لئے ہسپتال منتقل کر دیا گیا جو کہ ڈکیتی و راہزنی کی متعدد وارداتوں میں ریکارڈ یافتہ نکلا ہے.
واضح رہے کہ شہر میں چوریم ڈکیتی،رہزانی اور زیادتی جیسے واقعات کا ہونا معمول کا حصہ بن چکا ہے جس کی وجہ سے عوام میں خوف وہراس پھیل چکا ہے، عوامی تحفظ کے لئے پولیس اہلکار اور دیگر سکیورٹی ادارے سرگرم عمل ہیں جبکہ شہر کی گلیوں اور سڑکوں پر وارداتیں بڑھنے سے شہری خوف میں مبتلاہیں۔
گزشتہ دنوں فیکٹری ایریا میں دو ڈاکوؤں کی گن پوائنٹ پر گھر کے باہر شہری سے لوٹ مار کی سی سی ٹی وی فوٹیج منظر عام پر آئی تھی، شہریوں نے کمال بہادری کا مظاہرہ کرتے ہوئے ڈکیتی کی کوشش ناکام بنائی جبکہ گولیوں کا سامنا بھی کرتے رہے۔
گلستان کالونی قینچی امرسدھو میں شہری کے ساتھ ڈکیتی کی کوشش اس کے بھائی نے کمال بہادری کے ساتھ ناکام بنائی۔ مزاحمت پر ڈاکوؤں نے بے دریغ فائرنگ سے بھی اجتناب نہ کیا لیکن خوش قسمتی سے کوئی جانی نقصان نہ ہوا۔