لاہور: صوبہ پنجاب میں ضمنی انتخابات کے لیے صوبائی الیکشن کمشنر پنجاب کے دفتر میں کنٹرول روم قائم کر دیا گیا۔

الیکشن کمشنر پنجاب نے کہا ہے کہ پولنگ کے سلسلے میں کنٹرول روم قائم کیا جا چکا ہے، ووٹرز 042-99212209 اور 042-99212620 پر شکایات درج کرا سکتے ہیں۔

صوبائی الیکشن کمشنر نے کہا ووٹرز بلا خوف و خطر ووٹ کاسٹ کرنے گھروں سے نکلیں، پولنگ اسٹیشنز پر سیکیورٹی کے فول پروف انتظامات کیے گئے ہیں۔

ادھر چیف الیکشن کمشنر کی جانب سے بھی پیغام جاری کیا گیا ہے، جس میں انھوں نے عوام سے کہا کہ ووٹرز نکلیں اور اپنا حق استعمال کریں، ووٹ دینے سے جمہوریت مضبوط ہو گی، اور پاکستان کو مزید استحکام ملے گا۔

چیف الیکشن کمشنر نے قانون نافذ کرنے والے اداروں کو سخت کاروائی کی ہدایت بھی جاری کر دی ہے، جس میں انھوں ںے کہا کہ قانون کی خلاف ورزی اور پر تشدد واقعات روکے جائیں۔

سی ای سی نے ہدایت کی ہے کہ ریٹرننگ افسران قانون کی خلاف ورزی اور پر تشدد واقعات کا فوری نوٹس لیں، اور جہاں ضروری ہو وہاں قانون نافذ کرنے والے اداروں کو ہدایات جاری کی جائیں۔

انھوں نے یہ بھی کہا کہ قانونی خلاف ورزی اور پر تشدد کیس فوری طور پر الیکشن کمیشن بھجوائے جائیں۔