عابد چوہدری: سی ٹی ڈی کی انٹیلی بیسڈ کارروائی، کالعدم تنظیم کے 2 دہشتگرد گرفتار، دونوں دہشت گردوں کو جلوپنڈکے قریب سے گرفتار کیا گیا۔
تفصیلات کے مطابق کاؤنٹر ٹیریرزم ڈیپارٹمنٹ نے کارروائی کرتے ہوئے کالعدم تنظیم کے 2 دہشت گردوں کو گرفتار کیا ہے جن کا تعلق القاعدہ سے بتایا جارہا ہے۔ دہشت گردوں کی شناخت عبدالمنان اور اخترکے نام سے ہوئی ہے۔ سی ٹی ڈی کا کہنا ہے کہ دہشتگردوں سے بارودی مواد، پریماکارڈ اور اسلحہ برآمد ہوا۔ دہشت گردوں کیخلاف تھانہ سی ٹی ڈی میں مقدمہ درج کرتے ہوئے انہیں مزید تفتیش کے لیے نامعلوم مقام پر منتقل کر دیا گیا ہے۔
واضح رہے گزشتہ ہفتے کاؤنٹر ٹیررازم ڈیپارٹمنٹ( سی ٹی ڈی) نے خفیہ اطلاع پر فیروز والا میں ایک گھر پر چھاپہ مارا تو دہشتگردوں نے سی ٹی ڈی فورس پر فائرنگ کر دی ،جس پر سی ٹی ڈی نے بھی فائرنگ کی، جوابی فائرنگ میں تینوں دہشتگرد مارے گئے تھے۔
ترجمان سی ٹی ڈی کے مطابق دہشتگرد فیروز والا میں کرائے کے مکان میں رہائش پذیر تھے، تینوں ہلاک ہونے والے دہشتگردوں کا تعلق افغانستان سے تھا۔
حملہ آروں سے خود کش جیکٹ، افغان تذکرہ کارڈ ، تین ہینڈ گرنیڈ، دو کلاشنکوف اور دیگر بارودی مواد برآمد ہو ا تھا، دہشت گرد محرم الحرام میں تخریب کاری کی منصوبہ بندی کر رہے تھے، دہشتگردوں نے اہم شخصیات کو ٹارگٹ کرنا تھا۔ سی ٹی ڈی ذرائع نے بتایا تھا کہ ہلاک ہونیوالوں میں احسان اللہ، نعمت اللہ، عبد اسلام شامل ہیں۔