(مانیٹرنگ ڈیسک) معروف ڈیزائنر فریحہ الطاف نےادکارہ ایمان علی کو نئی ماڈلز کے حوالے سے متنازعہ بیان دینے پر آڑے ہاتھوں لے لیا۔
معروف ماڈل و اداکارہ ایمان علی نے کچھ روز قبل عفت عمر کے شو میں شرکت کی تھی جہاں انہوں نے فیشن انڈسٹری میں قدم رکھنے والے نئے چہروں کے حوالے سے متنازعہ بیان میں کہا تھا کہ نئی ماڈلز میں نہ کوئی ماڈلنگ کا طریقہ ہے اور نہ ہی ان لوگوں کے پاس معلومات عامہ ہے۔
ایمان علی کے بیان پر سوشل میڈیا صارفین کی جانب سے شدید تنقید دیکھنے میں آئی یہاں تک کہ انڈسٹری کی نامور شخصیات نے بھی ایمان علی کے بیان پر برہمی کا اظہار کیا یہی وجہ ہے کہ معروف فیشن ڈیزائنر فریحہ الطاف بھی خاموش نہ رہیں، انہوں نے بھی اداکارہ کے بیان کو پروپیگنڈا قرار دے دیا۔
فریحہ الطاف نے سماجی رابطے کی ویب سائٹ ٹوئٹر پر ایمان علی کو آڑے ہاتھوں لیتے ہوئے کہا کہ ’میں ایمان علی کے رویے پر حیران و پریشان ہوں، انہوں نے نہ صرف ماڈلز کی تضحیک کی ہے بلکہ ماہرہ خان اور فواد خان کے خلاف بھی اول فول بکا ہے۔
واضح رہےکہ گزشتہ روز ایمان علی کے متنازع بیان پر ماڈل مشک کلیم نے بھی سوشل میڈیا پر اپنے تحفظات کا اظہار کیا، انہوں نے اپنی پوسٹ میں لکھا مجھے سمجھ نہیں آرہی کہ ایمان علی جیسی سینئر آرٹسٹ ، ماڈل اور ایکٹریس فیشن انڈسٹری کی ماڈلز کیلئے ایسا متکبرانہ بیان دے سکتی ہے، ایمان کے مطابق جو ماڈلز ہماری انڈسٹری میں کام کررہی ہیں ان کے پاس بنیادی معلومات عامہ نہیں، مشک کلیم نے کہا کہ جہاں تک انگریزی بولنے کی بات ہے تو یہ ہماری مادری زبان نہیں اور ہر کوئی اسے صحیح طرح سے نہیں بول سکتا اور اس میں کوئی مسئلہ نہیں۔
یاد رہے کہ ایمان علی پاکستانی ٹیلی ویژن اور فلم کے اداکار عابد علی کی بیٹی ہیں، ایمان علی نے اپنی اداکاری کا آغاز شعیب منصور کی 2007ء کی فلم خدا کے لیے سے کیا، اُنہوں نے شعیب منصور کی دوسری فلم بول (فلم) میں بھی کام کیا جو 2011ء میں منظر عام پر آئی۔