ویب ڈیسک: پارلیمنٹ کی پبلک اکاؤنٹس کمیٹی نے 9 مئی کے واقعات میں ملوث ریٹائرڈ سرکاری ملازمین کی پنشن روکنے کی ہدایت کردی ہے ۔
چیئرمین نور عالم خان کی زیر صدارت پبلک اکاؤنٹس کمیٹی کا اجلاس ہوا جس میں اعلیٰ حکام نے شرکت کی، چیئرمین نورعالم خان نے 9 مئی کو سرکاری املاک پر حملے کرنے والوں کے خلاف کارروائی کرنے کی ہدایت کرتے ہوئے کہا کہ ملوث ریٹائرڈ سرکاری افسروں کی پنشن روک دی جائے۔
انہوں ںے کہا کہ 9 مئی کو جو کچھ ہوا اس کی مذمت کرتے ہیں، جن ریٹائرڈ لوگوں نے 9 مئی کے مظاہروں میں شرکت کی ان کی پنشن روکنے کی وفاقی اور صوبائی حکومتوں کو ہدایت کرتے ہیں۔
رکن پی اے سی مشاہد حسین سید نے اس موقع پرکہا کہ کیا ہم کسی کی پنشن روکنے کا حکم دے سکتے ہیں؟ اس پر نور عالم خان نے کہا کہ یہ ہدایات صرف اینٹی اسٹیٹ کارروائیوں میں شرکت کرنے والوں کے لیے ہے، جو نوجوان اس کارروائی میں ملوث ہیں انہیں سرکاری نوکریاں نہ دی جائیں۔