اب نہیں آنا، میں نہیں آنا شہر تیرے!

ویب ڈیسک : بھارت سے تعلق رکھنے والے عالمی شہرت یافتہ پنجابی گلوکار  دلجیت دوسانجھ ناقص انتظامات سے تنگ آگئے ، انہوں نے بھارت میں ہی اسٹیج پر اعلان کردیا کہ وہ بھارت میں مزید پرفارم نہیں کریں گے 

بھارتی میڈیا کے مطابق دلجیت دوسانجھ نے ہفتے کو چندی گڑھ میں ایک ہاؤس فل کنسرٹ میں شاندار پرفارمنس دی لیکن اس دوران  انہوں نے اپنے مداحوں کو یہ کہہ کر اداس کردیاکہ  وہ آئندہ بھارت میں کوئی شو نہیں کریں گے۔ 

دلجیت دوسانجھ نے اس فیصلے کی وجہ  بھارت میں کنسرٹ کے ناقص انفراسٹرکچر اور انتظامات کو قرار دیا اور حکام سے اپیل کی کہ وہ بہتر سہولیات فراہم کریں کیونکہ کنسرٹ انڈسٹری ملک میں تیزی سے ترقی کر رہی ہے۔دلجیت دوسانجھ نے چندی گڑھ میں اپنے کنسرٹ کے اختتام پر حکومت اور متعلقہ حکام سے مخاطب ہو کر کہا کہ وہ ملک میں لائیو شوز کے لیے انفراسٹرکچر پر توجہ دیں۔ ان کا کہنا تھا کہ ہمارے پاس لائیو شوز کے لیے مناسب سہولیات نہیں ہیں ۔جس کی وجہ سے گلوکار اور فنکار پریشان ہوتے ہیں ۔

 انہوں نے اعلان کیا کہ وہ اس وقت تک بھارت میں شوز نہیں کریں گے جب تک اسٹیج کو درمیان میں  نہیں بنایا جائے گا۔

دلجیت دوسانجھ نے کہا کہ میں آئندہ کوشش کروں گا کہ اسٹیج کو درمیان میں لگایا جائے تاکہ فینز میرے ارد گرد ہوں۔ جب تک ایسا نہیں ہوتا، میں بھارت میں پرفارم نہیں کروں گا۔ اس لیے میری درخواست ہے کہ انتظامیہ انفراسٹرکچر پر کام کرے۔