’’شہید کی جو موت ہے وہ قوم کی حیات ہے‘‘

عمر اسلم :سابق صوبائی وزیر شہید کرنل( ر) شجاع خانزادہ کی برسی ،صدرمسلم لیگ ن میاں شہبازشریف ،نائب صدر مریم نواز نے خراج عقیدت پیش کیا ہے۔

سابق صوبائی وزیر کرنل ر شجاع خانزادہ کی آج برسی کےسلسلے میں صدرمسلم لیگ ن میاں شہبازشریف نے انہیں خراج عقیدت  پیش کرتے ہوئے ٹوئیٹ میں کہاکہ پانچ سال قبل آج ہی دن ان کے قریبی دوست شجاع خانزادہ شہید ہوئے تھے ۔انھوں نے بطور وزیر دہشتگردی کے خاتمے کے لئے موثر کردار ادا کیا اور جان کا نذرانہ دیا۔ شہبازشریف کاکہناتھاکہ شہید شجاع خانزادہ بہادر اور عظیم انسان تھے۔

ن لیگ کی نائب صدر مریم نواز نے بھی ان کی خدمات کے اعتراف میں ٹوئیٹ کرتے ہوئے لکھا ہے کہ شہید کی جو موت ہے وہ قوم کی حیات ہے۔

 

یاد رہے کہ پاکستان کے صوبہ پنجاب کے وزیر داخلہ کرنل ریٹائرڈ شجاع خانزادہ 16 اگست کو خودکش حملے میں ہلاک ہو گئے،وہ 28 اگست 1943 کو صوبہ پنجاب کے شہر اٹک کے گاؤں شادی خان میں پیدا ہوئے تھے۔
انھوں نے ابتدائی تعلیم ضلع اٹک سے حاصل کی اور پھر سنہ 1966 میں اسلامیہ کالج پشاور سےگریجویشن کیا،سنہ 1967 میں اُنھوں نے پاکستان فوج میں کمیشن حاصل کیا اور سنہ 1971 کی پاک بھارت جنگ میں حصہ لیا۔
شجاع خانزادہ نے سنہ 1974 سے 1978 تک ملٹری انسٹرکٹر کے طور پر بھی فرائض سر انجام دیے،شجاع جانزادہ اُن چند افراد میں سے ایک تھے جو سب سے پہلے سنہ 1983 کو دنیا کے بلند ترین جنگی محاذ سیاچن گلیشیئر پر پہنچے تھے۔