ویب ڈیسک: بالی ووڈ کے دبنگ اسٹار سلمان خان کو حالیہ دنوں میں موصول ہونے والی ایک اور دھمکی نے سب کو چونکا دیا تھا، لیکن اس بار پولیس کی گرفت میں آئے ملزم نے تفتیش کے دوران ایسا انکشاف کر دیا کہ اہلکار بھی حیران رہ گئے۔ ملزم کا کہنا ہے کہ اس نے یہ حرکت کسی ذاتی دشمنی یا انتقامی جذبے کے تحت نہیں کی، بلکہ اس کا مقصد بالکل مختلف اور غیر متوقع تھا۔

ممبئی پولیس نے گجرات کے شہر وڈودرا سے تعلق رکھنے والے ایک نوجوان کو گرفتار کیا ہے، جس نے اعتراف کیا ہے کہ وہ یہ سب کچھ صرف انسٹاگرام پر فالوورز بڑھانے کے لیے کر رہا تھا، گرفتار ملزم کی شناخت مئینک پانڈیا کے نام سے ہوئی ہے، جو اپنے والدین کے ساتھ رہتا ہے اور جوس اسٹال پر کام کرتا ہے۔

پولیس کے مطابق ملزم نے ممبئی ٹریفک پولیس کے واٹس ایپ ہیلپ لائن نمبر پر دھمکی آمیز پیغام بھیجا، جس میں نہ صرف سلمان خان کو قتل کی دھمکی دی گئی بلکہ یہ بھی بتایا گیا کہ انہیں کس طریقے سے مارا جائے گا۔

ابتدائی تفتیش میں انکشاف ہوا کہ ملزم گینگسٹر لارنس بشنوئی سے متاثر تھا اور اس کے نقشِ قدم پر چلتے ہوئے سوشل میڈیا پر شہرت حاصل کرنا چاہتا تھا۔

پولیس کو دیے گئے بیان میں مئینک پانڈیا نے اعتراف کیا کہ اس کا مقصد کسی ذاتی رنجش یا جرائم پیشہ سرگرمی کا حصہ بننا نہیں تھا بلکہ وہ صرف انسٹاگرام پر مشہور ہونا چاہتا تھا۔

 مئینک پانڈیا کا کہنا تھا کہ آُس نے گوگل پر ممبئی ٹریفک پولیس کا واٹس ایپ ہیلپ لائن نمبر تلاش کیا اور وہاں ایک سنسنی خیز پیغام بھیج دیا، جس میں سلمان خان کو جان سے مارنے کی دھمکی دی گئی تھی اور انتظار کرنے لگا کہ کب وہ خبروں میں آئے۔

پولیس نے ملزم کے خلاف تعزیرات ہند کی متعدد دفعات کے تحت مقدمہ درج کر لیا ہے اور مزید تفتیش جاری ہے۔ دوسری جانب سلمان خان کی سیکیورٹی میں بھی فوری طور پر اضافہ کر دیا گیا ہے تاکہ کسی بھی ممکنہ خطرے سے محفوظ رہا جا سکے۔