ویب ڈیسک : وزیرِاعظم شہباز شریف نے کہا ہے کہ آج کے دن ہم ایسے عالمی معاشرے کے قیام کی کوششیں جاری رکھنے کا عزم کرتے ہیں جو منصفانہ، مساوی اور جامع ہوں۔
وزیرِاعظم شہباز شریف نے جمہوریت کے بین الاقوامی دن پر پیغام دیتے ہوئے کہا کہ آج جبکہ دنیا بھر میں جمہوریت کا عالمی دن منایا جا رہا ہے، اس موقع پر ہم انسانی معاشرے کی بنیادی اور اہم قدر کے طور پر جمہوریت کی مضبوطی اور فروغ کے عزم کا اعادہ کرتے ہیں.
شہباز شریف نے کہا کہ ہماری حکومت کا آئینی اقدار کی پاسداری،جمہوریت، قانون کی حکمرانی اور انسانی حقوق کے تحفظ کا عزم غیر متزلزل ہے، ان جمہوری اقدار پر عملدرآمد ہمارے قومی طرزِعمل کی عکاسی کرتا ہے، آج کے دن ہم ایسے عالمی معاشرے کے قیام کی کوششیں جاری رکھنے کا عزم کرتے ہیں جو منصفانہ، مساوی اور جامع ہوں ۔ انہوں نے کہا کہ باہمی تعاون سے ہی ہم جمہوریت کی بنیادوں کو مضبوط کرکے یہ امر یقینی بنا سکتے ہیں کہ یہ امید کی کرن کے ساتھ ساتھ آئندہ نسلوں کی ترقی کا پیش خیمہ ثابت ہو.