روزینہ علی : آج رات موسم کی صورتحال کے حوالے سے محکمہ موسمیات کا کہنا ہے کہ ملک کے بیشترعلاقوں میں موسم خشک رہنے کا امکان ہے، تاہم کشمیر، بالائی خیبرپختونخوا، جنوبی پنجاب اور شمال مشرقی، جنوبی بلوچستان میں چند مقامات پر آندھی ، جھکڑ چلنے اورگرج چمک کے ساتھ بارش کا امکان ہے ۔ 

محکمہ موسمیات کے مطابق بھکر، سبی48، نور پور تھل47، گوجرانولہ46، حافظ آباد، جیکب آباد، جہلم، جوہر آباد، سرگودھا، ڈی جی خان، لیہ، قصور، منڈی بہاؤالدین، نارووال اوراوکاڑہ میں 45 ڈگری سینٹی گریڈ درجہ حرارت ریکارڈ کیا گیا۔

اتوار کے روز موسم کی صورتحال 

اتوار کے روز موسم کی صورتحال کے متعلق محکمہ موسمیات کا کہنا ہے کہ اسلام آباد اور گردونواح میں دن کے اوقات میں موسم شدید گرم اور خشک جبکہ بعداز دوپہر گرد آلود ہوائیں اور جھکڑ چلنے کا امکان ہے ۔ خیبرپختونخوا کے بیشتر اضلاع میں موسم گرم اور خشک، جنوبی اضلاع مین شدید گرم رہنے کے علاوہ بعداز دوپہر گرد آلود ہوائیں ، جھکڑ چلنے کا امکان ہے،  تاہم شام یا رات میں دیر، سوات، کرم، کوہستان، مانسہرہ اور وزیرستان میں آندھی اور گرج چمک کے ساتھ چند مقا مات پر بارش کا امکان ہے۔ 

محکمہ موسمیات کے مطابق پنجاب کے بیشتر اضلاع میں موسم گرم اور خشک جبکہ وسطی ، جنوبی اضلاع میں موسم شدید گرم رہنے کا امکان ہے، جبکہ بعداز دوپہر گرد آلود ہوائیں  اور جھکڑ چلنے کا امکان ہے۔ بلوچستان کے بیشتر اضلاع میں موسم گرم اور خشک رہنے کا امکان ہے۔ سندھ کے بیشتر بالائی اضلاع میں موسم شدید گرم جبکہ ساحلی علاقوں میں گرم اور مرطوب رہے گا، تاہم بالائی/وسطی اضلاع میں بعد از دوپہر گرد آلود ہوائیں /جھکڑ چلنے کا امکان ہے۔ اس کے علاوہ کشمیر اور گلگت بلتستان میں دن کے اوقات میں موسم گرم رہنے کے علاوہ شام یا رات میں تیز ہواؤں اور گرج چمک کے ساتھ چند مقامات پر بارش کا امکان ہے۔