’ملک کے بیشتر علاقوں میں موسم سرد ، پہاڑی مقامات پربرفباری‘

سٹی 42 :محکمہ موسمیات نے کہا ہے کہ ملک کے بیشتر علاقوں میں موسم سرد اورخشک جبکہ پہاڑی علاقوں میں شدیدسرد رہنے کا امکان ہے، تاہم بالائی علاقوں میں مطلع جزوی ابر آلود رہنے کا امکان ہے، جبکہ شمال مشرقی/جنوبی پنجاب پنجاب میں بعض مقامات پرہلکی دُھند چھائے رہنے کی توقع ہے۔

سوموار کے روزموسم کی صورتحال کے متعلق محکمہ موسمیات کا کہنا ہے کہ اسلام آباد اور گردونواح میں موسم سرد اور خشک رہنے کا امکان ہے، جبکہ صبح کے اوقات میں بعض مقامات پر ہلکی دھند پڑنے کی توقع ہے۔ خیبرپختونخوا کے بیشتر اضلاع میں موسم سرد اورخشک جبکہ پہاڑی علاقوں میں شدید سرد اور مطلع جزوی ابر آلود رہنے کا امکان ہے۔ تاہم چترال، دیر ،سوات, کرم اور گردنواح میں ہلکی بارش اور پہاڑوں پر ہلکی برفباری ہو سکتی ہے۔

محکمہ موسمیات کے مطابق پنجاب کے بیشتر اضلاع میں موسم سرد اورخشک رہنے کا امکان ہے، جبکہ مری، گلیات اور گردو نواح میں موسم شدید سرد اور مطلع جزوی ابرآلود رہنے کی توقع ہے۔ اس کےعلاوہ صبح کے اوقات میں سیالکوٹ، ناروال، گوجرنوالہ، جہلم، راولپنڈی ، لاہور ،فیصل آباد، ساہیوال، اوکاڑہ ، ملتان،بہاولپور، رحیم یار خان ، بہاولنگراور گردونواح میں بعض مقامات پر ہلکی سے درمیانی دُھند چھائے رہنے کی توقع ہے ۔ 

محکمہ موسمیات کا کہنا ہےکہ بلوچستان کے بیشتر اضلاع میں موسم سرد اورخشک جبکہ پہاڑی علاقوں میں شدید سرد رہنے کا امکان ہے ۔ سندھ کے بیشتر اضلاع میں موسم سرد اورخشک رہنے کا امکان ہے، تاہم صبح کے اوقات میں سکھر ، شکارپور، کشمور، خیر پور اور گردونواح میں ہلکی دھند چھائے رہنے کی توقع ہے۔ اس کے علاوہ کشمیر اور  گلگت بلتستان میں موسم شدید سرد اور مطلع جزوی ابرآلود رہنے کا امکان ہے ۔