(فہد بھٹی)شالیمار لنک روڈ پر نوجوان کے گلے پر ڈور پھر گئی ، افسوسناک واقعے میں زخمی نوجوان کو ہسپتال منتقل کر دیا گیا۔
تفصیلات کے مطابق نوجوان موٹرسائیکل پر جا رہا تھا کہ گلے پر ڈورپھرنے سے زخمی ہو گیا، زخمی نوجوان کو طبی امداد کے لیے شالیمار ہسپتال منتقل کر دیا گیا۔ پولیس کے مطابق 24 سالہ یونس کی حالت خطرے سے باہر ہے۔
پابندی کے باوجود خونی کھیل جاری ہے جو حکومت اور قانون نافذ کرنے والے اداروں کے لئے کسی چیلنج سے کم نہیں ۔عوام پہلے بھی بارہا مطالبہ کر چکے ہیں کہ پتنگ بازی کے خونی کھیل کو مکمل طور پر بند کرنے کے لئے موثر اقدامات کئے جائیں تاکہ قیمتی جانوں کا ضیاع رک سکے ۔یہ کوئی پہلا واقعہ نہیں بلکہ رواں سال اس قسم کے بہت سے واقعات پیش آ چکے ہیں جن میں بہت سی قیمتی جانیں ضائع اور متعدد لوگ زخمی ہو چکے ہیں۔