(سٹی42)بالی ووڈ کے مشہور اداکار نے خودکشی کرلی، رسی کا پھندہ لگا کر خودکشی کی اور اس واقعے کی اطلاع اُن کے نوکر نے پولیس کو دی۔
تفصیلات کے مطابق بالی ووڈ کے مشہور اداکار 34 سالہ نوجوان سوشانت سنگھ راجپوت نے خودکشی کرلی ہے۔سوشانت سنگھ راجپوت ممبئی کے علاقے باندرہ میں واقع اپنے گھر میں مردہ حالت میں پائے گئے۔ممبئی پولیس کا بھی یہ ہی کہناتھا کہ وہ اتوار کی صبح ممبئی کے علاقے باندرہ میں موجود اپنی رہائش گاہ میں مردہ پائے گئے۔ اداکارنے رسی کا پھندہ لگا کر خودکشی کی اور اس واقعے کی اطلاع اُن کے نوکر نے پولیس کو دی۔ ابھی خودکشی کی وجہ سے سامنے نہیں آئی ہے تاہم اس واقعے کی تحقیقات جاری ہے۔
واضح رہے کہ سوشانت سنگھ نے بالی ووڈ میں اپنے کیرئر کا آغاز حالیہ برسوں میں ہی کیا تھا اور ان چند برسوں میں اُنہوں نے بہت سی کامیاب فلمیں کی ہیں۔اُنہوں نے بھارتی کرکٹر مہندر سنگھ دھونی کی زندگی پر بننے والی فلم میں ایم ایس دھونی کا کردار ادا کیا تھا، اِس کے علاوہ اُنہوں نے عامر خان کی مشہور فلم ’پی کے‘ میں پاکستانی لڑکے سرفراز کا کردار نبھایا تھا۔سوشانت سنگھ کی مشہور فلموں میں پی کے، ایم ایس دھونی (دی ان ٹولڈ اسٹوری)، چھچھورے، ڈٹیکٹو بیو مکیش بخشی اور کائی پوچے جیسی فلمیں شامل ہیں۔'چھچھورے' 2019 میں ریلیز ہونے والی ان کی آخری فلم تھی۔ فلم کامیابی کے ساتھ ساتھ بہت اچھا بزنس کرنے میں بھی کامیاب رہی تھی۔
فلمی اداکار ہونے کے ساتھ ساتھ وہ ٹی وی کے بہت سے پروگراموں کی کامیاب میزبانی کے لیے خاصے مشہور تھے۔پاکستان میں ان کی شہرت کی وجہ فلم 'پی کے' کے کردار 'سرفراز' سے ملی۔ ان کے نام کے ساتھ انہی کا ایک ڈائیلاگ منسوب کردیا گیا تھا کہ 'سرفراز دھوکہ نہیں دے گا'۔