احتشام کیانی: پی ٹی آئی کے بانی عمران خان اور ان کی اہلیہ بشریٰ بی بی  پر  190 ملین پاؤنڈ کیس کا فیصلہ مؤخر کرنے کے تحریری حکم نامہ میں کہا گیا  ہےکہ سپرنٹنڈنٹ اڈیالہ جیل کے ذریعے بانی پی ٹی آئی کو عدالت میں پیش ہونے کے لیے طلب کیا گیا مگر بانی پی ٹی آئی نے کمرہ عدالت آنے سے انکار کیا۔ عدالت نے ملزموں کا دو گھنٹے انتظار کرنے کے بعد فیصلہ سنانے کا عمل مؤخر کیا۔

  تفصیلات کے مطابق 190 پاؤنڈ ریفرنس کیس کے فیصلے کا مؤخر ہونے کا حکم نامہ  منگل کے روز جاری کر دیا گیا۔

 احتساب عدالت کے جج ناصر جاوید کے تحریری حکمنامہ میں کہا گیا کہ 2 گھنٹے انتظار  کرنے کے باوجود ملزمان عدالت میں پیش نہیں ہوئے، عمران خان نے فیصلہ سننے کے لیے کمرہ عدالت میں آنے سے انکار کیا۔

حکم نامہ میں کہا گیا کہ ریفرنس کا فیصلہ اب 17 جنوری کو سنایا جائےگا، آئندہ تاریخ پر ملزمان اور متعلقہ افراد بر وقت حاضری یقینی بنائیں۔

 گزشتہ سماعت کے دوران جج ناصر جاوید 9 بجے سے کمرہ عدالت میں موجود تھے تاہم عمران خان، بشریٰ بی بی اور ان کے وکلا کمرہ عدالت میں نہیں پہنچے جس کے باعث فیصلہ مؤخر کیا گیا۔

عدالت نے سترہ جنوری کو دونوں ملزموں کی فیصلہ سنائے جانے کے وقت عدالت میں موجودگی یقینی بنانے کی بابت کوئی بات نہیں کہی۔