سٹی42: وزیراعظم شہباز شریف نے ملک بھر میں دہشت گردوں کے خلاف آپریشنز پر آرمی چیف کی قیادت میں سیکیورٹی فورسز کی نتیجہ خیز کارروائیوں کی تعریف کرتے ہوئے اس یقین کا اظہار کیا ہے کہ دہشت گردی کے نیٹ ورک فتنہ الخوارج کا جلد ہی ہمیشہ کے لیے خاتمہ کردیا جائے گا۔
وزیراعظم نے منگل کو اسلام آباد میں وفاقی کابینہ کے اجلاس سے خطاب کرتے ہوئے کہا کہ دہشت گرد گروپ کے خلاف انتھک کارروائیاں جاری ہیں، کامیاب امن معاہدے کے بعد کرم میں امن بحال ہو گیا ہے۔
وزیر اعظم نے کہا کہ علاقے میں کھانے پینے کی اشیاء اور ادویات فراہم کی جا رہی ہیں۔ انہوں نے اس اعتماد کا اظہار کیا کہ تمام اسٹیک ہولڈرز امن کو برقرار رکھنے کے لیے اجتماعی کوششیں کریں گے۔
فوج کی کوششوں پر روشنی ڈالتے ہوئے شہباز شریف نے کہا کہ بلوچستان اور کے پی میں مختلف سیکیورٹی آپریشنز کے دوران بڑی تعداد میں دہشت گردوں کو بے اثر کیا گیا ہے، قوم مسلح افواج کی قربانیوں کو تسلیم کرتی ہے۔ انہوں نے کہا کہ نواز شریف کی قیادت میں 2018 کی طرح ملک میں امن بحال ہو گا۔
وزیراعظم نے مزید کہا کہ پاکستان ایران سرحد پر تجارتی راستے دوبارہ کھل گئے ہیں جس سے دو طرفہ تجارتی ٹریفک میں اضافہ ہوا ہے۔
شہباز شریف نے کہا کہ پنجگور میں پاکستان ایران سرحد پر ایک نیا کراسنگ پوائنٹ کھول دیا گیا ہے، اس سے قانونی تجارت کو فروغ ملے گا اور اسمگلنگ کو روکنے میں مدد ملے گی۔ انہوں نے نئے کراسنگ پوائنٹ کے افتتاح پر ایرانی تعاون کا شکریہ ادا کیا۔