ویب ڈیسک:آئی سی سی چیمپئنز ٹرافی، بھارتی ٹیم تو پاکستان نہ آئی مگر بھارت کپتان پاکستان آئیں گے، بھارتی میڈیا کا بڑا دعویٰ۔

 بھارتی میڈیا کا کہنا تھا کہ بھارت ٹیم کے کپتان روہت شرما کی چیمپئنز ٹرافی سے قبل پاکستان آمد متوقع ہے، روہت شرما ممکنہ طور پر چیمپئنز ٹرافی کیلئے پاکستان میں فوٹو شوٹ اور پریس کانفرنس میں شرکت کریں گے، چیمپئنز ٹرافی میں شریک آٹھوں ٹیموں کے کپتان ایک پریس کانفرنس اور فوٹو شوٹ کے لیے اکٹھے ہوں گے۔

 آئی سی سی کے مطابق ہر ایونٹ سے قبل میزبان ملک میں تمام کپتانوں کا اجتماع کیا جاتا ہے، روہت شرما کے پاکستان دورے کے حوالے سے حتمی فیصلہ ابھی ہونا باقی ہے۔

یاد رہے کہ  چیمپئنز ٹرافی کا آغاز 19 فروری کو پاکستان اور نیوزی لینڈ کے میچ سے ہوگا، بھارت اپنی مہم کا آغاز 20 فروری کو بنگلہ دیش کے خلاف دبئی انٹرنیشنل اسٹیڈیم میں کرے گا۔