حسن علی : پاکستان پیپلز پارٹی کی قیادت کا لاہور میں ڈیرے ڈالنے کا فیصلہ، سابق صدر آصف علی زرداری اورچیئرمین بلاول بھٹو زرداری آج لاہور پہنچیں گے۔

ذرائع کے مطابق سابق صدر آصف علی زرداری کراچی سے جبکہ بلاول بھٹو زرداری ملتان سے لاہور پہنچیں گے،بلاول بھٹو زرداری تین، چار دن لاہور میں قیام کریں گے، چیئرمین پیپلز پارٹی مختلف کارکنوں کے گھر تعزیت کیلئے بھی جائیں گے۔

ذرائع کا کہنا ہےکہ  پیپلز پارٹی کی سینٹرل ایگزیکٹو کمیٹی کا اجلاس کل 3 بجے بلاول ہاؤس میں ہوگا،اجلاس میں بلوچستان اور خیبر پختونخوا کی انتخابی نشستوں پر بھی بات کی جائے گی، سندھ میں پیپلز پارٹی کی حکومت اور ترقیاتی کاموں کی رپورٹ بھی پیش کی جائے گی۔

پیپلز پارٹی کی قیادت نے سینٹرل ایگزیکٹو کمیٹی کے تمام ممبران کو لاہور پہنچنے کی ہدایت کردی،سی ای سی کا کوئی بھی ممبر اجلاس میں ویڈیو لنک کے ذریعے شریک نہیں ہوگا۔