ویب ڈیسک: دبٖئی میں مقیم بے روزگار پاکستانی نے دس لاکھ درہم کی لاٹری جیت لی، آزاد کشمیر میں سپر مارکیٹ اور دبئی میں ریسٹورنٹ کھولنے کی خواہش ظاہر کردی۔
رپورٹ کے مطابق دبئی میں لاجسٹکس کی ایک کمپنی میں اکاؤنٹ منیجر رہنے والے راجہ وجاہت کو دو ماہ پہلے نوکری سے فارغ کردیا گیا تھا اور وہ 28 اگست تک دن رات نوکری ڈھونڈ رہے تھے۔ تاہم ایک رات جب وہ دبئی میں اپنی سالگرہ کی پارٹی کررہے تھے ان کے ایک رشتہ دار نے انہیں خوشخبری سنائی۔ راجہ وجاہت نے 10 لاکھ درہم ( چار کروڑ 58 لاکھ پاکستانی روپے) متحدہ عرب امارات کی ایک لاٹری میں جیت لئے تھے۔
محظوظ لاٹری نے راجہ وجاہت کو اپنے ہفتہ وار ڈرا کا 14 واں لکھ پتی قرار دیا۔ وہ اس قرعہ اندازی میں دو سال سے حصہ لے رہے تھے۔ راجا وجاہت کا کہنا تھا کہ وہ اسلام آباد میں گھر بنانے اور آزاد کشمیر میں اپنے آبائی علاقے باغ میں ایک سپر مارکیٹ کھولنے کا ارادہ رکھتے ہیں جبکہ باقی رقم سے وہ دبئی میں ایک ریستوران کھولیں گے۔