ویب ڈیسک: شنگھائی تعاون تنظیم (ایس سی او) کے اجلاس کے سلسلے میں راولپنڈی اور اسلام آباد میں میٹرو بس سروس بند رکھنے کا فیصلہ کیا گیا ہے۔
ضلعی انتظامیہ کی ہدایت کے مطابق، 14 سے 17 اکتوبر تک جڑواں شہروں میں یہ سروس معطل رہے گی۔
میٹرو بس سروس کی انتظامیہ نے وضاحت کی ہے کہ 13 اکتوبر تک میٹرو بس سروس معمول کے مطابق چلے گی۔ یہ اجلاس 15 اور 16 اکتوبر کو پاکستان، اسلام آباد میں منعقد ہو رہا ہے، جہاں مختلف ممالک کے وزرائے اعظم شرکت کریں گے۔
دفتر خارجہ کی ترجمان ممتاز زہرا بلوچ نے بتایا کہ شنگھائی تعاون تنظیم کے رکن ممالک جیسے چین، روس، بیلا روس، قازقستان، کرغزستان، تاجکستان، اور ازبکستان کے وزرائے اعظم اپنے اپنے ملکوں کی نمائندگی کریں گے۔ اس کے علاوہ، اجلاس میں ایران کے اول نائب صدر اور بھارت کے وزیر خارجہ بھی شرکت کریں گے۔
ترجمان نے مزید بتایا کہ وزیراعظم شہباز شریف اجلاس کے دوران مختلف ممالک سے آنے والے وفود کے سربراہان کے ساتھ اہم دو طرفہ ملاقاتیں کریں گے۔ اس اجلاس میں معیشت، تجارت، ماحولیات، اور ثقافتی و سماجی روابط جیسے اہم مسائل پر خصوصی تبادلہ خیال کیا جائے گا۔ یہ اجلاس علاقائی تعاون کو فروغ دینے کی ایک اہم کوشش ہے۔