ویب ڈیسک: ڈرامہ انڈسٹری کی معروف اداکارہ و ماڈل یشما گِل کا قومی کھلاڑیوں سے متعلق بات کرتے ہوئے کہناہے کہ کرکٹر بابر اعظم سے اگر دوستی ہو جائے تو اس میں کوئی حرج نہیں ہے۔
اداکارہ یشما گِل نے حال ہی میں ڈیجیٹل پلیٹ فارم کے لیے ایک پوڈکاسٹ کو انٹرویو دیا جہاں اُنہوں نے متعدد دلچسپ سوالات کے جواب دیےاور کیریئر سمیت دیگر معاملات پر کُھل کر بات کی۔ پوڈ کاسٹ کے دوران میزبان فہد انصاری نے اداکارہ سے کرکٹ اور قومی کھلاڑیوں میں سب سے زیادہ پسندیدہ کھلاڑی سے متعلق سوال پوچھ ڈالا، اس دوران میزبان نے اداکارہ سے کھلاڑیوں کی جانب سے دیگر اداکاراؤں کو موصول ہونے والے پیغامات پر بھی بات کی۔
قومی کرکٹ ٹیم کے کھلاڑیوں سے دوستی سے متعلق سوال پر اداکارہ کا کہنا تھا کہ کرکٹرز سے دوستی ہوسکتی ہے، کرکٹرز سے کیوں نہیں دوستی کی جا سکتی، وہ اتنے اچھے اور باصلاحیت ہیں اور ہمارے ملک کا نام روشن کر رہے ہیں۔
اداکارہ یشما گِل نے میزبان کی جانب سے بابر اعظم سے دوستی سے متعلق سوال کے جواب میں مسکراتے ہوئے کہا کہ وہ قومی کرکٹر سے دوستی کرنا نہیں چاہتیں لیکن اگر ان ( بابر اعظم) سے دوستی ہوجائے تو اس میں کوئی حرج نہیں ہے۔اس پر اداکارہ یشما گِل کا کہنا تھا کہ مجھے بابر اعظم پسند ہیں کیوں کہ وہ عالمی سطح پر ناصرف پاکستان کی نمائندگی کرتے ہیں بلکہ وہ دنیا کے بہترین بلے باز بھی ہیں۔ یشما گِل نے بابراعظم کی کارکردگی کو بھی سراہا اور سابق کپتان کی کامیابی کو پاکستان کی کامیابی قرار دیا۔
کرکٹرز کی جانب سے اداکاراؤں کو موصول ہونے والے میسیجز سے متعلق سوال پر اداکارہ کا کہنا تھا کہ مجھے کسی اداکارہ نے آج تک نہیں بتایا کہ اِنہیں کوئی کرکٹر میسیجز کرتا ہے، مجھے خود بھی آج تک کسی کرکٹر کا کوئی میسج نہیں آیا ہے اور نہ ہی میں نے کبھی کسی کرکٹر کو کوئی میسج بھیجا ہے۔ میری آج تک نہ کسی کرکٹر سے بات چیت ہوئی ہے اور نہ ہی میں کسی کرکٹر سے ملی ہوں۔