(عابد چودھری) مسافروں کے روپ میں کوسٹر میں سوار ہونے والے ڈاکوؤں نے مانگا منڈی کے علاقے میں مسافروں کو لوٹ لیا۔ تین مسلح ڈاکوؤں نے بیس سے زائد مسافروں سے لاکھوں مالیت کے زیورات، نقدی اور موبائل فونز لوٹ لیے۔
لاہور سے چونیاں جانے والی کوسٹر میں تین مسلح ڈاکو مسافروں کے روپ میں ٹھوکر نیاز بیگ سے سوار ہوئے جنہوں نے مانگا منڈی کے علاقے میں پہنچ کر مسافروں اور بس عملے کو یرغمال بنا لیا اور لوٹ مار شروع کر دی، ڈاکو مسافروں کو یرغمال بناتے ہوئے بیس سے زائد مسافروں سے لاکھوں مالیت کے زیورات، نقدی اور موبائل فونز سمیت دیگر قیمتی سامان لوٹ کر ملتان روڈ پر فرار ہو گئے۔
ڈی ایس پی رائیونڈ نوید اکمل کا کہنا ہے کہ موقع سے شواہد اکٹھے کر لیے ہیں، ملزمان کو جلد گرفتار کرلیں گے جبکہ پولیس کی جانب سے کوسٹر کو چونیاں بھجوا دیا گیا۔