نشتر پارک (حافظ شہباز علی) سابق عظیم ٹیسٹ کرکٹر مرحوم عبدالقادر کو خراج تحسین پیش کرنے کے لیے نمائشی میچ کل لاہور میں کھیلا جائیگا، نامور کرکٹرز میچ میں شریک ہونگے، ان خیالات کا اظہار ساگا سپورٹس کے علی سیف نے نیشنل ہاکی سٹیڈیم میں پریس کانفرنس کرتے ہوئے کیا۔ اس موقع پر ٹیسٹ کرکٹر عبدالرحمان اور ٹیسٹ کرکٹر عمران نذیر بھی موجود تھے۔
علی سیف کا کہنا تھا کہ ملک کے نامور ٹیسٹ کرکٹرز کو خراج تحسین پیش کرنے کے لیے ساگا سپورٹس کے زیر اہتمام پہلا نمائشی میچ ماضی کے نامور لیگ سپن باؤلر مرحوم عبدالقادر کے نام پر کرایا جا رہا ہے، اتوار کے روز لاہور میں کھیلے جانے والے اس میچ میں قومی اور بین الاقوامی نامور کرکٹرز حصہ لیں گے، جن میں اظہر علی، عمران نذیر، عبدالرحمان، رانا نوید الحسن، ہمایوں فرحت، عمران فرحت سمیت دونوں ٹیموں میں ٹاپ خواتین کھلاڑی بھی شامل ہونگی۔
اس موقع پر ٹیسٹ کرکٹر عبدالرحمان کا کہنا تھا کہ یہ ایک بہت اچھا اقدام ہے جس سے ماضی کے نامور کھلاڑیوں کی خدمات کو خراج تحسین پیش کیا جائے گا۔
ان کا کہنا تھا کہ مرحوم عبدالقادر کی پاکستان کے لیے بڑی خدمات ہیں جن کو خراج تحسین پیش کیا جانا ضروری تھا۔
ٹیسٹ کرکٹر عمران نذیر نے عبدالقادر کوخراج تحسین پیش کرنے کے لیے میچ کے انعقاد کو خوش آئند قرار دیتے ہوئے کہنا تھا کہ یہ سلسلہ بہت پہلے شروع ہونا چاہیے تھا۔