(عابد چودھری)شہر میں ڈاکو بے لگام ہیں،دن دیہاڑے ڈاکوؤں نے دوران واردات مزاحمت کرنے پر رکشہ ڈرائیور کو فائرنگ کر کے زخمی کر دیا اور رکشہ لوٹ کر فرار ہو گئے ۔
تفصیلات کے مطابق امن و امان کی خراب صورتحال، قتل و غارت گری، اغوا برائے تاوان، خواتین و بچوں کے ساتھ زیادتی و اغوا، ڈکیتی و چوری کی بڑھتی ہوئی وارداتوں اور سرعام فائرنگ جیسے جرائم میں خطرناک حد تک اضافے نے شہریوں کی زندگی اجیرن بنا دی ہے، پولیس اور قانون نافذ کرنے والے اداروں کی طرف سے جرائم پر قابو پانے اور شہریوں کے جان و مال کی حفاظت کے لئے عملی اقدامات ہوتے نظر نہیں آرہے۔
رکشہ ڈرائیور محمد رضا کے مطابق وہ گارڈن ٹاؤن کے علاقے برکت مارکیٹ کے قریب سے جناح ہسپتال کی جانب جا رہا تھا کہ اسی دوران ڈاکوؤں نے اسے روک لیا اور گن پوائنٹ پر یرغمال بناتے ہوئے رکشہ چھیننے کی کوشش کی جس پر رکشہ ڈرائیور کی جانب سے مزاحمت کی گئی،مزاحمت کرنے پر ڈاکوؤں نے رکشہ ڈرائیور پر فائرنگ کر دی اور رکشہ لیکر موقع سے فرار ہو گئے،ریسکیو نے رکشہ ڈرائیور کو طبی امداد کے لئے ہسپتال منتقل کر دیا جبکہ پولیس کا کہنا ہے کہ واردات کا مقدمہ درج کر کے تحقیقات کی جا رہی ہیں۔