سٹی 42 : پنجاب کی وزیراعلی مریم نواز نے کہا ہے کہ پنجاب کو انوائرمنٹ کے مسائل کا سامناہے، پنجاب کو معاشی طورپر مستحکم اور ایک عوامی فلاحی صوبہ بنانا چاہتی ہوں۔ 

وزیراعلی مریم نوازشریف نے ماحولیاتی آلودگی کے خاتمے کے لئے چین کے ساتھ مشترکہ ورکنگ گروپ قائم کرنے کی تجویز پیش کر دی، جس میں کہا گیا کہ بیجنگ پنجاب ورکنگ گروپ کے ذریعے نالج شیئرنگ، پالیسی سازی، کیپسٹی بلڈنگ، ڈیٹا شیئرنگ اورٹیکنالوجی ٹرانسفر پر کام کیاجائے گا، بیجنگ پنجاب ورکنگ گروپ سے کاربن کے اخراج میں کمی کے اقدامات کے لئے گرین اربن پلاننگ، گرین انرجی، ای ٹرانسپورٹ کو ممکن بنایا جائے گا ۔ 

وزیراعلیٰ مریم نواز نے شنگھائی مو سمیاتی تبدیلی اور ماحولیات سے متعلق خصوصی اجلاس سےخطاب میں کہا کہ 32سال بعد چین کا دورہ کیا تو ایک نیا چین دیکھنے کو ملاجسے لوگ دور حاضر کا معجزہ کہتے ہیں، چین یکسر بدل چکا ہے، چین ایک جیتا جاگتا معاشی معجزہ ہے،ہر شعبے میں چین کی ترقی معجزاتی ہے ، چین انفراسٹرکچر، تربیت یافتہ ہیومن ریسورس اور صنعتی ترقی کے لحاظ سے ایک معجزہ ہے ۔ انہوں نے کہا کہ چین نے ماحولیاتی اور فضائی آلودگی پرمکمل کنٹرول کر کے دنیا کو دنگ کر دیا ہے، ماحولیات کے شعبے میں مہارت رکھنے والے چین کے وزیر ماحولیات نہایت ہی قابل شخصیت ہے،خراج تحسین پیش کرتی ہوں، چین کے وزیر ماحولیات نے چین کے انوائرمنٹ کوبہتر اورزندگی کو سانس لینے کے قابل بنایا ۔ 

مریم نواز نے کہا کہ چین کے موثر اور دیر پا اقدامات ماحولیات کی بہتری کی کمٹمنٹ کو ظاہر کرتے ہیں۔ انہوں نے کہا کہ چین کے صدر شی جن پنگ نے پہلی دفعہ مشترکہ منزل کا ویژن دیا ، چین کے صدر نہ صرف اپنی محنت کا ثمر بلکہ کامیابیو ں میں بھی دوسروں کو شریک کررہے ہیں، چین ماحولیاتی آلودگی کے خطرے سے دوچار ممالک کی معاونت کررہاہے، چین نے 800ملین افرادکو غربت سے نکالا اور ان کا معاشی سٹیٹس بلند کیا۔ مریم نواز نے کہا کہ پاکستان میں فضائی آلودگی کا مسئلہ گزشتہ چند سالوں سے گھمبیر صورتحال اختیار کرچکا ہے ، ٖپنجاب ایک بڑا صوبہ ہے،15کروڑ عوام کے صوبے کی چیف ایگزیکٹو ہوں ، پنجاب کو انوائرمنٹ کے مسائل کا سامناہے، پنجاب کو معاشی طورپر مستحکم اور ایک عوامی فلاحی صوبہ بنانا چاہتی ہوں ، ایسا پنجاب چاہتی ہوں جہاں لوگ محسوس کریں کہ حکومت ان کا ماں کی طرح احساس رکھتی ہے ۔ انہوں نے کہا کہ پنجاب کو ماحولیاتی اعتبار سے مضبوط اور توانا بنانے کے لئے پرعزم ہیں، پنجاب کی متحرک اور سرگرم سینئر منسٹر ماحولیات کی بہتری کے لئے دن رات کوشاں ہے ۔ 

وزیراعلیٰ مریم نواز نے کہا کہ سینئر منسٹر ماحولیات میں لمحہ بہ لمحہ بہتری کے لئے اقدامات کررہی ہیں، سینئر منسٹر نے موسمیاتی تبدیلی اور ماحولیات کی بہتری کے لئے قابل عمل اور قابل تحسین ایجنڈا پیش کیا، پاکستان میں عموما سموگ کا سپیل100سے 120دن تک محیط ہوتا ہے، فضائی آلودگی راتوں رات ختم نہیں ہوسکتی، شارٹ، میڈیم اورلانگ ٹرم پلاننگ کی جارہی ہے۔ انہوں نے کہا کہ فضائی آلودگی کے حوالے سے چائنہ کے بلند عزائم قابل تقلید اور قابل تحسین ہیں۔ 

مریم نواز نے کہا کہ بلیو ٹیک کلین ائیر الائنس کا دورہ کرکے فضائی آلودگی کے خاتمے کیلئے چین کے اقدامات سے آگاہی حاصل کی، بلیو ٹیک ائیر الائنس میں ماہرین سے بہت سی چیزیں جاننے، سمجھنے اور تبادلہ خیال کاموقع ملا ، چند روز میں فضائی آلودگی ختم ہوگئی ہم اس کے اسباب جاننے کی کوشش کررہے ہیں ۔ انہوں نے کہا کہ پنجاب کے لوگو ں کو صاف ستھرا ماحول فراہم کرنے کے لئے ہرممکن اقدام کرنے کا عزم رکھتے ہیں ، فضائی آلودگی کے آنے پر ہمیں سکول، انڈسٹری سمیت دیگر شعبوں کو بند کرنا پڑتا ہے،  فضائی آلودگی آنے کی وجہ سے کاروبار زندگی متاثر اور ہر کام ساکت ہوجاتاہے، ائیر پولیشن کو کنٹرول کرنے کے لئے روزانہ کی بنیاد پر کام کررہے ہیں، منصب سنبھالتے ہی پہلی جامع کلائمیٹ چینج، ایکشن پلان او رپالیسی دی ، ایگرکلچر، ٹرانسپورٹ او رانڈسٹریل سیکٹر میں ماحول دوست اصلاحات متعارف کرائی جا رہی ہیں۔ 

وزیراعلیٰ مریم نواز نے کہا کہ زراعت میں جدت لانے کیلئے میکانزیشن اور ای میکانزیشن متعارف کرا رہے ہیں، زراعت کے پرانے اور روایتی طریقے تبدیل کر کے جدت لائی جا رہی ہے، فصلوں کی با قیات کو جلانے پر موثر انداز میں کنٹرول کیا جا رہاہے، پرانی زرعی مشینری کو سپر سیڈر جیسے زرعی آلات سے تبدیل کررہے ہیں۔ انہوں نے کہا کہ پنجاب کی پہلی ای ٹرانسپورٹ پالیسی متعارف کرائی، چائنہ کی طرز پر بتدریج روایتی ٹرانسپورٹ کو ای ٹرانسپورٹ میں بدل رہے ہیں، ماحولیاتی آلودگی سے بچاؤ کے لئے وہیکل فٹنس سر ٹیفکیٹشن کو یقینی بنا رہے ہیں۔ مریم نواز نے بتایا کہ انڈسٹریل یونٹس کی ریئل ٹائم مانیٹرنگ کرکے ماحول دوست پالیسی کو یقینی بنا رہے ہیں ۔

انہوں نے مزید کہا کہ چین کے معزز وزیر ماحولیات کی حیاتیاتی تنوع اور وائلڈ لائف کے تحفظ کے لئے مہارت قابل تحسین ہے، ماحولیاتی آلودگی کے خلاف جنگ جیتنے کے لئے ہمیں چین کے مشاہدات اور تجربات سے سیکھنے کی ضرورت ہے ، مجھے توقع ہے کہ اس میٹنگ سے حوصلہ افزا نتائج کی خواہاں ہوں، پنجاب کے لوگ چین کے ماحولیاتی آلودگی کے لئے اقدامات سے مستفید ہوسکیں گے، ماحولیاتی آلودگی میں کمی اور خاتمے کے لئے چین کے بھرپو رتعاون کے منتظر ہیں، مشترکہ ورکنگ گروپ کے ذریعے ہم ایک دوسرے کے ساتھ آئیڈیاز، ٹیکنالوجی او رتجربات شیئر کرسکتے ہیں۔ 

انہون نے کہا کہ چین کی تقلید کرتے ہوئے پنجاب میں گرین انرجی اورقابل تجدید انرجی کے پراجیکٹ پر ہم کام کررہے ہیں، چین میں داخل ہوتے ہی ہوائی جہاز سے ونڈ انرجی کے بہت بڑے کوریڈور کو دیکھنے کا موقع ملا ، ونڈ مل کے پراجیکٹ کو دیکھنا متاثر کن تھا،یوں لگ رہا تھا جیسے فرشتے ونڈ مل کے پروں کو چلا رہے ہیں، چائنہ کے وزٹ سے پہلے پنجاب میں سولر پینل پراجیکٹ لانچ کر دیا گیا ہے، انہوں نے کہاکہ سولر پینل پراجیکٹ کے لئے چین کی کمپنیوں سے اشتراک کار کیاجارہاہے ، لوگ بجلی کے بڑھتے ہوئے نرخوں کی وجہ سے معاشی مشکلات کا شکار ہیں ، پنجاب کو بتدریج کلین انرجی، گرین انرجی اورسولر پراجیکٹ پر منتقل کررہے ہیں ۔