ویب ڈیسک : پنجاب کی وزیر اطلاعات عظمیٰ بخاری نے کہا ہے کہ حکومت صحافیوں کو زمین خود الاٹ کرے گی اور انہیں صرف تعمیراتی چارجز ادا کرنے ہوں گے۔

عظمیٰ بخاری نے لاہور پریس کلب ہاؤسنگ سکیم ایف بلاک میں بجلی کی تنصیب کا افتتاح کردیا۔ اس موقع پر گفتگو میں انہوں نے کہا کہ صحافی کالونی فیز ٹو وزیر اعلیٰ پنجاب مریم نواز کے "اپنی چھت اپنا گھر" پروگرام کا تسلسل ہے، کالونی میں 36 کروڑ روپے کی لاگت سے پانی، بجلی اور دیگر بنیادی سہولیات فراہم کی جائیں گی، پریس کلب میں سولر بیک اپ کو بڑھایا جائے گا جبکہ کینٹین، انشورنس اور سبسڈی اسکیموں کو بھی مزید بہتر بنایا جائے گا۔ انہوں نے کہا کہ وہ خود کو صحافی برادری کا حصہ سمجھتی ہیں اور صحافیوں کی فلاح و بہبود کے لیے ہر ممکن اقدام کریں گی۔

وزیر اطلاعات نے کہا کہ صحافی کالونی کو اسٹیٹ آف دی آرٹ بنانے کے لیے روڈا منصوبے کے تحت کام جاری ہے اور 36 کروڑ روپے کی لاگت سے پانی، بجلی سمیت دیگر بنیادی سہولیات فراہم کی جائیں گی۔ انہوں نے کہا کہ حکومت صحافیوں کو زمین خود الاٹ کرے گی اور انہیں صرف تعمیراتی چارجز ادا کرنے ہوں گے۔

 عظمیٰ بخاری نے کہا کہ اب مسائل کو مستقل بنیادوں پر حل کیا جائے گا۔9مئی کے واقعات قوم کے مفاد میں نہیں تھے اور مسلم لیگ (ن) ہی ملک میں سرمایہ کاری اور پسے ہوئے طبقات کے مسائل کے حل کے لیے عملی اقدامات کر رہی ہے۔ انہوں نے کہا کہ وزیراعلیٰ پنجاب کی حکومت میں اب چھوٹے ملازمین کو قربانی کا بکرا نہیں بنایا جاتا بلکہ ذمہ داری اوپر سے طے کی جاتی ہے۔ پتنگ بازی اور کتے کے کاٹنے جیسے واقعات کی بھی کڑی نگرانی کی جا رہی ہے۔

مزید برآں عظمیٰ بخاری نے اعلان کیا کہ گندم کی نقل و حمل پر اب کوئی پابندی نہیں اور مریم نواز کی قیادت میں کسانوں کا تحفظ یقینی بنایا جائے گا تاکہ روٹی کی قیمت میں اضافہ نہ ہو۔

عظمیٰ بخاری نے واضح کیا کہ ’’بلوچستان پاکستان کا لازمی حصہ ہے اور اندرونی و بیرونی سازشوں کو ہمیشہ کی طرح ناکام بنایا جائے گا۔‘‘ جو سیاستدان دہشت گردوں کی پشت پناہی کرے، وہ سیاستدان کہلانے کا حق دار نہیں۔ انہوں نے کہا کہ بانی پی ٹی آئی پہلے دن سے این آر او کے لئے بھیک مانگ رہے ہیں لیکن کوئی انہیں سننے کو تیار نہیں۔  قوم کا مفاد مسلم لیگ (ن) کے ساتھ ہے، جو عوام کے مسائل حل کرنے اور سرمایہ کاری کے فروغ کے لئے عملی اقدامات کر رہی ہے۔