(ویب ڈیسک) وزیراعلیٰ پنجاب کی دوڑ میں شامل ق لیگ اور ن لیگ شامل ہیں اس حوالے سے مسلم لیگ (ق) نے پنجاب کی وزارتِ اعلیٰ کے لیے ایک بار پھر سابق صدر آصف زرداری سے رابطہ کرلیا۔
تفصیلات کےمطابق وزارت عظمیٰ لئے شہباز شریف ملک کے 23 ویں وزیراعظم منتخب ہوچکے ہیں جبکہ وزیراعلیٰ پنجاب کا چناؤ ابھی باقی ہے، وزیراعلیٰ پنجاب کا انتخاب فوری کرانے سے متعلق کیس کی سماعت لاہور ہائیکورٹ کیس کی سماعت جاری ہے۔
دوسری جانب (ق) لیگ کے رہنما طارق بشیر چیمہ اور چوہدری شجاعت کے بیٹے چوہدری سالک حسین کی آصف زرداری سے ملاقات ہوئی جس میں انہوں نے سابق صدر کو چوہدری شجاعت کا پیغام پہنچایا۔طارق بشیر چیمہ اور سالک حسین نے پنجاب میں وزیراعلیٰ کے لیے پرویز الٰہی کی حمایت کی درخواست کی ہے۔
ذرائع نے بتایا کہ (ق) لیگی رہنماؤں کی بات پر آصف زرداری مسکرا پڑے اور کوئی جواب نہیں دیا۔ لیگی رہنماؤں کی جانب سے پیپلزپارٹی کے ارکان پنجاب اسمبلی سے بھی انفرادی رابطے کیے گئے ہیں تاہم پیپلز پارٹی ارکان نے فیصلے کو آصف زرداری کی منظوری سے مشروط کردیا۔