جنید ریاض: یوٹیلیٹی اسٹورز پر مہنگائی کا سونامی، مختلف اشیاء کی قیمتوں میں اضافے کا نوٹیفکیشن جاری کردیا۔ مختلف برانڈز کے گھی کی قیمتوں میں 96 روپے تک فی کلو اضافہ کردیا گیا۔
تفصیلات کے مطابق مختلف برانڈز کے گھی کی قیمتوں میں 96 روپے جبکہ کوکنگ آئل 97 روپے تک فی لیٹر مہنگا کردیا گیا۔کارن کوکنگ آئل 370 روپے تک فی لیٹر مہنگا ہونے سے کارن کوکنگ آئل کی قیمت 500 سے بڑھ کر 870 روپے فی لیٹر ہوگئی۔ ٹی وائٹنر کی 1.2 کلوگرام قیمت 40 روپے تک بڑھا دی گئی۔
کسٹرڈ،کھیر سمیت مختلف سویٹ ڈش کے چھوٹے ڈبے 10 روپے مہنگے جبکہ فیس کریم کی 50 گرام قیمت میں 40 روپے تک کا اضافہ ہوگیا۔ ٹشو کاڈبہ 15 اور ٹشو رول 5 روپے تک مہنگا کردیا گیا۔صابن، ٹی میکس اور لیکوڈ کلینر کی قیمتیں بھی بڑھادی گئیں ہیں۔
اسی طرح کالی مرچ کے ڈبے کی قیمت 10 روپے جبکہ چلی گارلک اورپیزا ساس کی قیمتوں میں بھی اضافہ ہوگیا۔ مختلف اشیاء کی قیمتوں میں اضافے کا نوٹیفکیشن بھی جاری کردیا گیا۔