فیروزپورروڈ (درنایاب) میٹرو بس سروس کا آپریشنل کنٹریکٹ کی مدت رواں ماہ ختم ہوجائے گی۔ البیراک نے میٹرو بس پراجیکٹ میں مزید 4 سال کی توسیع کی پیشکش کردی ۔ بس آپریٹر کمپنی البیراک نے مزید چار سال کی توسیع کیلئے 213 روپے فی کلومیٹر کی آفر دی ہے ۔
تفصیلات کے مطابق پنجاب ماس ٹرانزٹ اتھارٹی اور البیراک گروپ میں ستمبر 2012 ء میں معاہدہ ہوا تھا ۔ میٹروبسوں کی خریداری۔ آپریشنز اور مرمت کیلئے 8 سالہ معاہدہ طے پایا تھا ۔ معاہدہ اپنی مدت مکمل ہونے کے بعد رواں ماہ ختم ہوگا ۔ میٹرو بس آپریشنز کورونا لاک ڈاؤن، ملازمین کی ہڑتال اور تہواروں کی چھٹیوں کے باعث مجموعی طور پر ایک سال کیلئے متاثر رہا ۔
میٹر و پراجیکٹ کی توسیع کی صورت میں نئے معاہدے کے تحت 20سے21 ملین امریکی ڈالرکی بیرون ِ ملک ترسیل نہیں ہوگی ۔ ماس ٹرانزٹ کے موجودہ معاہدے میں توسیع کی وجہ سے 4 سال کے دوران 16 لاکھ روپے کی بچت ہوگی۔ شہر کا 7 سالہ صفائی معاہدہ فروری 2019 ء میں اختتام پذیر ہو چکا ہے ۔
حکومت کی جانب سے صفائی معاہدے میں دسمبر 2020 ء تک توسیع دے رکھی ہے ۔ کمپنی حکام کے مطابق پبلک ٹرانسپورٹ میں استعمال ہونیوالی میٹر و بسیں کم از کم 10 سے12 سال تک آپریشنل رہ سکتی ہیں ۔ کمپنی حکام کا کہنا ہے لاہور میٹرو بس سسٹم کیلئے خریدی جانے والی بسیں صرف 7 سال کیلئے فعال رہی ہیں جس کے معاہدے میں توسیع ہوسکتی ہے جس کیلئے آفر دی ہے۔