ابوبکر ارشد : معروف مذہبی سکالر ڈاکٹر ذاکر نائیک کی لاہور آمد پر مرکزی جمعیت اہلحدیث بتی چوک میں نماز جمعہ ادا کرنے کے لیے سکیورٹی کے سخت انتظامات کیے گئے ہیں۔ ڈاکٹر ذاکر نائیک کے ساتھ ان کے صاحبزادے شیخ فارق ذاکر نائیک بھی ہوں گے۔
ڈی آئی جی آپریشنز فیصل کامران نے مرکزی جمعیت اہلحدیث کے باہر سکیورٹی کے انتظامات کا جائزہ لیا اور اس بات کو یقینی بنایا کہ تمام حفاظتی تدابیر مکمل ہوں۔ انہوں نے راوی روڈ اور اس کے اطراف میں بھی سکیورٹی انتظامات کا معائنہ کیا۔
ڈی آئی جی آپریشنز فیصل کامران نے ایس پی سٹی سمیت تمام افسران کو ہدایت کی کہ وہ خود فیلڈ میں موجود رہیں اور سکیورٹی کی مانیٹرنگ کریں۔ ڈاکٹر ذاکر نائیک کو سٹیٹ گیسٹ کے درجہ کی سکیورٹی فراہم کی جا رہی ہے، جس میں ایلیٹ فورس کمانڈوز سمیت پولیس کی بھاری نفری تعینات کی گئی ہے۔شہریوں سے درخواست کی گئی ہے کہ وہ سکیورٹی انتظامات میں تعاون کریں اور کسی بھی مشکوک سرگرمی کی صورت میں فوراً متعلقہ اداروں کو اطلاع دیں۔ڈاکٹر ذاکر نائیک کی لاہور آمد کے دوران سکیورٹی انتظامات کو برقرار رکھنا عوامی تحفظ کے لئے انتہائی اہم ہے، اور اس سلسلے میں کوئی کوتاہی نہیں برتی جائے گی۔