سٹی42: سعودی عرب کے کراؤن ولی عہد شہزادہ محمد بن سلمان نےغزہ مین فوری جنگ بندی کا مطالبہ کیا ہے ۔
سعودی عرب کے دارالحکومت ریاض میں غزہ اور لبنان کی صورتحال پر مشترکہ عرب اسلامی سربراہی اجلاس سے خطاب کرتے ہوئے سعودی ولی عہد نے کہا کہ سعودی عرب فلسطینی علاقوں، لبنان اور ایران پر اسرائیل کے حملوں کی مذمت کرتا ہے، ہم خودمختار فلسطینی ریاست کے قیام کی حمایت کرتے ہیں۔ انہوں نے یہ بھی کہا ہے کہ بین الاقوامی برادری لبنان اور ایران کی سالمیت اور خود مختاری کے احترام کے لیے اسرائیل کو پابند کرے۔ہم خودمختار فلسطینی ریاست کے قیام کی حمایت کرتے ہیں۔
کانفرنس میں میزبان کی حیثیت سے کلیدی گفتگو کرتے ہوئے کراؤن پرنس محمد بن سلمان نے کہا کہ لبنان پر اسرائیل کے حملے نے لبنان کی خودمختاری اور سالمیت کو خطرے میں ڈال دیا ہے۔ہم اسرائیل کی مسجد اقصٰی کی بے حرمتی کی شدید الفاظ میں مذمت کرتے ہیں، بین الاقوامی برادری اسرائیل کو جنگ بندی پر مجبور کرے۔
سعودی عرب میں ہونے والے مشترکہ عرب اسلامی سربراہی اجلاس میں وزیراعظم پاکستان کے وزیراعظم شہباز شریف بھی شریک ہیں۔ عرب ممالک کے سربراہ، غیر عرب مسلم ممالک، عرب لیگ اور او آئی سی کے اعلیٰ حکام بھی اجلاس میں شریک ہیں۔
عرب میڈیا کے مطابق اجلاس میں 50 سے زائد سربراہان مملکت اور خصوصی نمائندے شرکت کررہے ہیں۔
فلسطین کے صدر محمود عباس نے عرب اسلامی سربراہی اجلاس سے خطاب میں کہا کہ اسرائیل کی جانب سے فلسطین میں اقوام متحدہ کے امدادی ادارے پر پابندی کے ہولناک نتائج برآمد ہوسکتے ہیں۔
فلسطینی صدر محمود عباس نے کہا کہ اقوام متحدہ کی سلامتی کونسل اسرائیل کی رکنیت معطل کرے اور بین الاقوامی برادری فلسطینیوں کے خلاف یہودی آبادکاروں کی جاری دہشت گردی روکنے میں مدد کرے۔
