سٹی42: پشاور کے سرکاری اسکول میں چلتا ہوا  پنکھا گرنے سے خاتون ٹیچر شدید زخمی ہوگئی۔

کلاس روم میں چلتا ہوا پنکھا ٹیچر پر گرنے کا واقعہ پشاور کے علاقے چغل پورہ میں قائم گورنمنٹ گرلز پرائمری اسکول میں پیش آیا ۔  پنکھے کی زد میں آنے والی خاتون ٹیچر بری طرح زخمی ہوگئیں۔ 

 سب ڈویژنل ایجوکیشن آفیسر چغل پورہ سرکل شمیم اختر نے اس حادثہ کی تصدیق کرتے ہوئے بتایا کہ زخمی ٹیچر کو فوری طبی امداد کیلئے ہسپتال منتقل کردیا گیا ہے جب کہ اعلیٰ حکام کو بھی واقعہ سے متعلق آگاہ کردیا ہے۔ شمیم اختر  نے بتایا کہ  اس حادثہ   میں کلاس روم میں موجود  بچیاں محفوظ رہیں۔ انہوں نے بتایا کہ یہ حادثہ اس لئے پیش آیا کہ  اسکول کی عمارت خستہ ہے،  اس کی مرمت اور تزئین و آرائش کیلئے سمری پہلے سے بھیج رکھی ہے۔