(عیشہ خان ) شاہدرہ میں کپڑوں کی فیکٹری میں سلنڈر دھماکے سے دو محنت کش جاں بحق جبکہ تین شدید زخمی ہو گئے، دوںوں جاں بحق افراد کا تعلق ایک ہی خاندان سے ہے۔

تفصیلات کے مطابق شاہدرہ میں کپڑوں کی فیکٹری میں چھٹی کے روز مزدور مشین ٹھیک کر رہے تھے کہ اسی دوران سلنڈر دھماکہ ہو گیا جس کے نتیجے میں دو مزدور جاں بحق جبکہ تین زخمی ہوگئے۔ حادثے کی اطلاع ملنے پر ریسکیو ٹیمیں اور پولیس موقع پر پہنچ گئی اور تمام زخمیوں کو طبی امداد کیلئے ہسپتال منتقل کر دیا۔

 واقعے کے عینی شاہد لڑکے کا کہنا ہے کہ بارہ کلو کے سلنڈر کی مدد سے لوہے کی پلٹیں کاٹی جا رہی تھیں کہ اچانک دھماکہ ہوگیا۔

پولیس کا کہنا ہے کہ جاں بحق ہونے والے دونوں افراد یونس اور عرفان کا تعلق ایک ہی گھر سے ہے اور دونوں رشتے میں سالا اور بہنوئی ہیں، زخمی ہونے والے افراد میں اشتیاق، شاہسوار اور عابد حسین شامل ہیں۔

پولیس کا کہنا ہے کہ ورثا کے بیان کے مطابق قانونی کارروائی عمل میں لائی جائیگی، اس سلسلہ میں جائے وقوعہ سے شواہد بھی اکٹھے کر لیے گئے ہیں۔