ویب ڈیسک:سابق گورنر پنجاب چودھری سرور نے کہا ہے کہ چودھری پرویز الہی کے پاس اعتماد کے ووٹ ک لئے نمبرز پورے نہیں، اسمبلیاں نہیں ٹوٹیں گی، چودھری پرویز الہٰی اور صوبائی وزرا بھی عہدہ نہیں چھوڑنا چاہتے۔
ایک انٹرویو میں چوہدری سرور نے کہا کہ دوستوں کیساتھ سیاست میں رہنے یا نہ رہنے پر مشاورت ہو رہی ہے، پنجاب میں نئی سیاسی جماعت بنانے کی خبریں میڈیا میں دیکھیں، انہوں نے کہا کہ اسمبلیاں نہیں ٹوٹیں گی، الیکشن اپنے وقت پر ہوں گے۔
دوسری جانب وزیراعلیٰ پنجاب چوہدری پرویز الہٰی کو عہدے سے ہٹانے کے نوٹیفکیشن کے خلاف درخواست پر لاہور ہائی کورٹ میں سماعت آج ہوگی۔رپورٹس کے مطابق عدالت عالیہ لاہور کا 5 رکنی بینچ درخواست کی سماعت کرے گا، بینچ کے ارکان میں جسٹس چوہدری اقبال، جسٹس طارق سلیم، جسٹس مزمل اختر شبیر اور جسٹس عاصم حفیظ شامل ہیں۔
واضح رہے کہ پرویز الہٰی کے اسمبلی نہ توڑنے کی یقین دہانی پر عدالت نے گورنر کے نوٹیفکیشن پر عمل درآمد 11 جنوری تک معطل کر دیا تھا۔ن لیگ نے آج اراکین اسمبلی کو لاہور ہائی کورٹ پہنچنے کی ہدایت کردی ہے۔
پی ٹی آئی رہنماؤں کا کہنا ہے کہ عدالت کہے گی تو پھر اعتماد کا ووٹ لینا پڑے گا، انہوں نے نمبر گیم پورا ہونے کا دعویٰ بھی کیا ہے۔