ویب ڈیسک :پنجاب کے سب سے بڑے اسپتال میو اسپتال لاہور میں ایڈز کے مریضوں کو الگ رکھنے کے بجائے جنرل وارڈ میں داخل کرنے کا انکشاف ہوا ہے۔
گزشتہ دنوں ملتان میں ایڈز کے مریض کے ڈائیلاسز کے دوران غفلت سے مزید کئی لوگوں کو ایڈز لاحق ہوگئی تھی کیونکہ تب بھی اسی مشین سے ایڈزاور دوسرے مریضوں کے ڈائیلسز کیے گئے تھے جس پر انکوائری بھی ہوئی تھی۔ اب میو اسپتال میں ایڈز کے مریضوں کو عام مریضوں کے ساتھ داخل کردیا۔
ایڈز کے تینوں مریضوں کے بیڈ ز پر ایچ آئی وی مریض لکھ کر لگادیا گیا ہے جبکہ وارڈ کا وہی اسٹاف ایڈز کے مریضوں کو دیکھ رہا ہے جو دوسرے مریضوں کی دیکھ بھال کرتا ہے۔ایک سینیئر لیڈی ڈاکٹر نے نام ظاہر کیےبغیربتایا کہ ایسے مریضوں کو علیحدہ رکھا جاتا ہے لیکن ہمارےپاس داخل کرائے گئے ہیں تو مجبوری ہے۔
میو اسپتال کے ایم ایس ڈاکٹر احتشام کا بھی کہنا ہے کہ ایسے مریض الگ ہی رکھے جاتے ہیں لیکن ہم نے فی الحال انہیں وارڈ میں رکھ کر ٹیگ کردیا ہے اور احتیاط سے کام کر رہے ہیں جلد ہی انہیں الگ وارڈ میں شفٹ کردیا جائےگا۔
دوسری جانب ایچ آئی وی لکھے جانے کی وجہ سے دیگر مریضوں اور لواحقین میں بھی خوف پیدا ہوچکا ہے ۔ ان کا کہنا ہے کہ ایڈز کے مریض بھی ان کے مریضوں کے ساتھ ہی موجود ہیں اور وہی عملہ ان کی دیکھ بھال کررہا ہے جس کی وجہ سے انکے مریضوں کو بھی بیماری لگنے کے چانسز ہیں
