سٹی42: فیڈرل بورڈ آف ریونیو (ایف بی آر) میں ان لینڈ ریونیو سروس کے گریڈ 20 کے سینئر افسر اظہر انصاری کو مدت ملازمت میں غیر قانونی توسیع کی کوشش مہنگی پڑ گئی، مبینہ طور پر ذاتی ڈیٹا، بالخصوص تاریخ پیدائش میں ٹیمپرنگ کرنے پر انہیں معطل کر دیا گیا ہے۔

ذرائع کے مطابق اظہر انصاری کے خلاف تاریخ پیدائش میں رد و بدل کے الزامات پر باقاعدہ انکوائری کی گئی۔ ایف بی آر کی جانب سے ممبر ایڈمن ایچ آر سعدیہ صدف گیلانی کو انکوائری آفیسر مقرر کیا گیا تھا جنہوں نے 29 اکتوبر 2024 کو اپنی رپورٹ ایف بی آر بورڈ کو جمع کروائی۔

تحقیقات میں الزامات ثابت ہونے پر اظہر انصاری کو معطل کر دیا گیا۔ بتایا گیا ہے کہ وہ ریٹائرمنٹ کے بعد بھی بطور کمشنر ان لینڈ ریونیو خدمات سرانجام دے رہے تھے۔

اظہر انصاری کو اس فیصلے کے خلاف 30 دنوں کے اندر سول سرونٹ اپیل رولز کے تحت اپیل کا حق حاصل ہے۔

ایف بی آر نے واضح کیا ہے کہ سرکاری اداروں میں جعلسازی اور اختیارات کے غلط استعمال کے خلاف زیرو ٹالرنس پالیسی پر عملدرآمد جاری رہے گا۔