جمال الدین : سابق وزیر اعلیٰ پنجاب چودھری پرویز الہٰی کی ترقیاتی منصوبوں میں کرپشن کیس میں ایک روزہ حاضری معافی کی درخواست منظور کر لی گئی۔
لاہور کی احتساب عدالت میں پی ٹی آئی رہنما چودھری پرویز الہٰی کیخلاف ترقیاتی منصوبوں میں اربوں روپے کی کرپشن اور کک بیکس وصولی کے ریفرنس کی سماعت ہوئی، جج زبیر شہزاد کیانی نے ریفرنس پر سماعت کی۔
پرویز الہٰی بیماری اور ہسپتال داخل ہونے کے باعث پیش نہیں ہوئے ان کی جانب سے ایک روزہ حاضری معافی کی درخواست دائر کی گئی۔
دوران سماعت وکلا نے موقف اپنایا کہ عدالتی حکم کے باوجود نیب گواہان کے بیانات کی نقول نہیں دی جا رہیں، ملزمان کو نیب انکوائری کے گواہان کے بیانات کی نقول دی جائیں۔
عدالت کی جانب سے ملزمان کو نیب انکوائری کے گواہان کے بیانات کی نقول نہ دینے پر ناراضگی کا اظہار کیا گیا۔
فاضل جج نے ریمارکس دیئے کہ اگر نیب کو ملزمان کو گواہان کے بیانات کی نقول دینے کا آخری موقع دے رہا ہوں آئندہ سماعت تک ملزمان کو ضروری دستاویزات نہ دیں تو ریفرنس واپس بھجوا دوں گا جس پر پراسیکیوٹر نے یقین دہانی کروائی کہ آئندہ سماعت تک نیب کاپیاں دے گا یا معاملے کو سپریم میں چیلنج کرے گا،چیئرمین نیب سےہماری اسی ہفتےاسلام آبادمیں میٹنگ طےہوئی ہے۔ہائیکورٹ کا فیصلہ سپریم کورٹ میں چیلنج کرنا چاہتےہیں،مہلت دی جائے .
بعدازاں عدالت نے پرویز الہٰی ایک روزہ حاضری معافی کی درخواست منظور کرتے ہوئے کیس کی مزید سماعت 25 ستمبر تک کیلئے ملتوی کر دی۔